سلطة البطاطا الصغيرة مع الدجاج

سلطة البطاطا مع الدجاج

سلطة الدجاج بحر واسع ممكن تعمليها بعدة طرق و عدة مكونات و تتبيلات و كلو طيب و لذيذ و بيفتح النفس .

بتعرفو أحياناً بحس في حوار بيني و بين المكونات , لما بكون ماشية في السوق بحس في مكونات بتندهلي و لما بقرب منها بتقلي :

  • بتذكري الوصفة الفلانية يلي فيها كذا و كذا
  • إيه مزبوط أنا يلي بتذكر كنت حابة جربها من زمان
  • طيب شو عم تستني اشتريني
  • مين قلك ما بدي أشتريكي بس كان معك مكونات تانية يا ترى بلاقي البقية
  • إيه إيه بتلاقي …دوري على البقية بتلاقين نحن بهالوقت موسمنا …. أنت اشتريني و كملي تسوق و بذكرك ببقية الشلة .
  • ماشي …. هي كيس الخضرة …. فوتو يا حلوات :D

هي السلطة سميتها سلطة البطاطا الصغيرة لأنو كتير من الناس بتسأل إنو شو ممكن أعمل بهالحجم من البطاطا قلي ما بتزبط و سلق بدي ضيع وقتي بتقشيرها ممكن تستغلي هالحجم من البطاطا بإنك تعملي أطيب صحن سلطة و على سيرة تقشير البطاطا أنا حبيت أحتفظ بقشرة البطاطا لأنو الفيتامينات بتكون تحت القشرة تمام , أما إذا ما كنت متعودة على قشرة البطاطا فيكي تقشريها عادي ,والدتي بعد ما خلصت تصوير الطبق غافلتني و قعدت قشرت كل البطاطا و لما شفتها كان بقيان كم وحدة مرعوبين و خايفين من السكينة إجيت أنقذتن …لذلك إلك الخيار بهالموضوع حسب ذوق عيلتك .

المقادير :

250 غ بطاطا صغيرة

3 حبة خيار كبيرة

3-2 حبة بصل أخضر

2 حبة فليفلة حمراء

300 غ صدور دجاج مخلية من العظم و الجلد

1 ملعقة صغيرة فلفل أسود مطحون طازج

2 ملعقة كبيرة زيت زيتون أو زيت نباتي

للتبيلة :

ليمون حسب الرغبة

زيت زيتون حسب الرغبة

ملح و فلفل

الطريقة :

  1. تغسل البطاطا من الأتربة و تسلق في ماء مملح حتى تنضج ثم تصفى .
  2. تغسل الخضروات و تصفى و تقطع بالورب و توضع في وعاء عميق ( بالنسبة للخيار يزال البذر ثم يقطع ) .
  3. تقطع صدور الدجاج إلى شرائط بسماكة الأصبع و تتبل بالفلفل و تدعك جيداً , يسخن الزيت في مقلاة واسعة على نار متوسطة و يقلى الدجاج مع التحريك حتى يصبح ذهبي اللون من الخارج و ينضج من الدخل ( اقطعي واحدة للتأكد من نضجها ) .
  4. تضاف البطاطا فوق الدجاج و تسخن مع التحريك ثم تضاف إلى مزيج الخضار , تخلط مكونات التتبيلة وتضاف لسلطة يحرك الجميع جيداً , تسكب في طبق التقديم و تقدم .

ملاحظات :

  1. عند تقلية الدجاج و البطاطا يجب التأكد من أن سوائل الدجاج قد تبخرت .
  2. للتنويع يمكن استخدام التتبيلة الإيطالية

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>