السحلب

 

طريقة عمل السحلب ( سحلب )

هالوصفة خص نص لعيون جارتي الدكتورة أنس لأنو طلبتها مني على اعتبار إنو بديت الشتوية , بالمقادير رح تشوفو كوب ماء ما تستغربو بالأول أنا ما كنت مقتنعة بالموضوع بس الشتوية الماضية ماما سألت بياع سحلب إذا كان بيحطو مع الحليب ماء فقلها منحط نص كمية الحليب ماء و كمان رفيقتي ظبيون سألت بياع تاني و كان الجواب نفسو مع زيادة بسيطة إنو الأفضل ثلث كمية الحليب ماء بشرط يكون الحليب كامل الدسم .

في أشخاص بيعملو السحلب بالنشاء بس بصراحة بحسها مهلبية مريقة و مع بودرة السحلب غير طعم , كنت أعتقد إنو العطار بيضيف نشاء للبودرة السحلب بس بعدين عرفت إنو جذور السحلب بتحتوي على نشاء و رح أحكيلكن شوي عنو لأنو نبتة كتير مفيدة .

السحلب نبات ذو زهر ينمو في تركيا في المروج الرطبة و الغابات و تكون زهور السحلب بلون أحمر أو بنفسجي في الأناضول و تستخدم كغذاء و كعلاج منزلي.

نبتة السحلب ذات ساق منتصبة و تتوضع الأزهار عليه بشكل متراكب يشبه السنبلة أو عنقود العنب و له أنواع أخرى زهرتها تشبه ألأوركيد أما الجذر ( أي الدرنات ) و هو الجزء المستخدم من النبتة فيحتوي على نوعين من الدرنات و تحتوي درناته على بروتين ومواد مرة وعلى حوالي 30% نشا، 13%دكسترينوبتوزينات وسكروز والزلات كالسيوم ومعادن وزيت طيار و 50% مواد صمغية وهلامية لهذا لابد من خفق شراب السحلب جيداً أثناء طبخه لتجنب التكتلات .

أما فوائده , فهو يفيد في علاج السعال و التهاب القصبات, ينشط عمل الدماغ , يقوي القلب , ينظم الطمث و يساعد في تقليل الديدان المعوية فضلاً عن تدفئة الجسم , و يمكنكم رؤية شكل النبتة في الصور الموجودة في التعليق .

المقادير :

⅓ كوب سكر

¼ 1  ملعقة صغيرة بودرة السحلب ( يمكن استعمال ½ 1 ملعقة صغيرة سحلب إذا كنت تفضلي القوام أسمك )

1 كوب ماء

3 كوب حليب

بضع نقاط من ماء الزهر المركز

الزينة : قرفة مطحونة

الطريقة :

  1. يوضع السكر و السحلب في محضرة الطعام و نشغل المحضرة حتى يختلط السكر مع السحلب جيداً و هذه خطوة مهمة لتحصلي على سحلب ناعم .
  2. يخلط الماء مع الحليب و يسكب بالتدريج على شكل خيط من فتحة المحضرة مع استمرار تشغيلها .
  3. يوضع المزيج في قدر و يرفع على نار متوسطة مع التحريك المستمر بالمضرب اليدوي حتى يبدأ بالغليان .
  4. تخفف النار و يترك يغلي مع التحريك المستمر لبضع دقائق حتى نحصل على قوام السحلب , يرفع عن النار و يضاف ماء الزهر و يحرك .
  5. يصب في أكواب التقديم و يزيين بالقرفة , يقدم ساخناً.

ملاحظة :

  1. بعض الأشخاص يفضلون إضافة مسكة مدقوقة للسحلب .
  2. استعملت في هذه الوصفة بودرة سحلب خالية من السكر و ليس المنتجات الجاهزة المتوفرة بالسوق و التي تحتاج الحليب فقط .

8 تعليقات

  1. يسلمو ايديك ياسها بتجنن بس كمية السحلب مو قليلة شوي ؟ يعني نصف او ربع ملعقة صغيرة كم غرام تقريبا .؟ يعني انا ماجربتها بس الظاهر بودرة السحلب فيها المادة الهلامية كتيرة وشكرا كتير سوسو

    • سها قمند

      هلا نور الشمس
      حبيبتي قرأتي المقادير غلط من ملعقة صغيرة و ربع حتى ملعقة صغيرة و نصف مو ربع ملعقة ;)
      و السحلب الخام مفعولو قوي غير النشاء و غير باكيتات السحلب الجاهزة بالأسواق

  2. بعششششششششق السحلب و خصوصاً بليالي الشتي
    يسلم إيديكِ :)

  3. يسلمو عالوصفة .. هلق انا بالامارات .. ما عنا بودرة سحلب بعمله بالنشا .. بس اكيد الأصلي غير

    • سها قمند

      أهلا و سهلا أم محمد
      الله يسلمك و يسلم حبابك
      مزبوط كلامك طعمة السحلب ببودرة السحلب أطيب بكتير إنشاء الله تحسني تلاقي و تستمتعي بطعمتو

  4. سؤال ست سها السحلب البودرة عندي هون بجيبه معلبات بس ما عبكون ب معلقة ونص كافي ليعطي السماكة ولا اللي عند العطار غير لانه ع بجيبه من عند الأتراك

    • سها قمند

      يا هلا أم لمار
      السحلب يلي بيكون معلبات هاد بيكون معو سكر و لازم تلتزمي بطريقة التحضير المكتوبة على العلبة
      أما السحلب الخام ( أنا بشتريه من العطار ) بيكون أقوى و بيكفي ليسمك قوام الحليب

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>