ليالي لبنان

ليالي لبنان

من أكتر من أسبوعين و لحد اليوم و في بداخلي شعور بالحنين للمعجنات و الحلويات و خاصة الوصفات يلي كنت أعملها زمان أيام الجامعة .

بدون شعور بسحب وراقي القديمة و بقعد بقلب بالوصفات , ما بعرف إذا هالحنين يلي بداخلي للوصفات بحد ذاتها و لا للذكريات الحلوة و لرفقاتي و جمعتنا و ضحكاتنا , يمكن عم حاول رجع هديك الأيام بس بقرارة نفسي بعرف لا يمكن ترجع …… بذكر بعد التخرج بكم سنة زرت الكلية لحتى أخد كشف علامات حسيت حالي بغير كوكب و بغير عالم رغم إنو الحيطان متل ماهي و الدرج يلي كنا نطلع عليه بعدو ع حالو , القاعات ما تغير فيها شي بس حاسة بغربة وقتها عرفت إنو يلي بيرسم اللحظات الحلوة مو بس المكان , الأشخاص يلي عاشو بهالمكان , حسيت حالي مشتاقة لدفعتي كلها رغم إنو كنا كتار و ما منعرف بعضنا .

هي الوصفة كانت من هديك الحقبة الزمنية و دائماً كنت أعملها ليش يا حزركن ؟؟ ……. لأنو ما فيها تعقيد حتى الصبابا الصغار يلي طالعين على الدنيا جديد ممكن يحضروها بكل بساطة .

المقادير :

طبقة السميد :

1 كوب سميد خشن

5 كوب حليب

3 ملعقة كبيرة سكر

طبقة الكريما :

1 علبة كريما بودرة ( بودرة كريم شانتيه )

¾ كوب حليب بارد

1 علبة قشطة

للتقديم :

قطر

موز

ليالي لبنان

يسكب القطر عند التقديم

الطريقة :

  1. يوضع الحليب في قدر عميق و يضاف السكر و السميد و ترفع القدر على النار مع التحريك المستمر حتى يسمك المزيج و ينضج السميد , يصب المزيج في وعاء كبير مستطيل الشكل (أو جات بايركس كبير ) , تترك حتى تبرد تماماً .
  2. تخفق الكريما مع الحليب البارد حتى تتكاثف جيداً ثم تضاف القشطة و نخفق حتى تتجانس المكونات و تمد فوق خليط السميد البارد .
  3. عند التقديم يقطع الموز شرائح و تصف فوق الكريما و يقدم مع وضع القطر في وعاء أخر بجانب الطبق ليضيف كل شخص من القطر حسب رغبته .

ملاحظات :

  1. تزين بالموز قبل التقديم مباشرة حتى لا يتغير لونه .
  2. لا تسكبي القطر فوق الحلوى قبل تقديمها و إلا سيتشرب السميد القطر و يفسد شكل الحلوى .

 

6 تعليقات

  1. يعيشوهالايدين متل ماعودتيناكل اكلاتك طيبين ومرتبين بس انابضفلامكسرات بدل الموزفكرة جديدة رح جرباانشالله

    • سها قمند

      و دياتك غدير
      الوصفة الأصلية فيها مكسرات محمصة على الوش و أنا متوقعة إنو رح يجيني تعليقات كتيرة على فكرة الموز , مع الموز أطيب بكتير من المكسرات بس تجربيها رح تحسي بفرق كبير بالطعمة
      بانتظار رأيك إذا جربتيها :)

  2. الوصفة رائعة جدا جدا. كنت كتير أحب هلأكلة من شغل ايديكي. وبصراحة تأثرت كتييييييييييير من حديثك عن ذكريات أيام الجامعة وكلامك كلو صح واحساسك بمحلو. إن شاءالله بتشوفي أيام أحلى من هديك الأيام.

    • سها قمند

      حبيبتي أحلام ما بنسى أيام الجامعة و الدراسة كيف كنا ندرس سوا و ناكل سوا , الله يرحم هديك الأيام
      إنشاء الأيام الجاية أحلى للجميع يا رب

  3. يسلمو هالأيادي حبوبة شي بشهي زكرتيني بهالوصفة زمان ما عملتها أنا بحط للوجه مكسرات وزبيب الموز فكرة جديدة :)

    • سها قمند

      إيه ماريا الموز كتير بيلبق معها و بيعطيها طعمة جديدة مميزة و طيبة
      فيكي إذا بتحبي ترشي مكسرات محمصة فوق الموز

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>