مربى الفريز بالليمون

مربى الفراولة

 

من فترة كانت والدتي عم تحضر برنامج طبخ أجنبي على قناة فتافيت و عملو مربى الفريز باستخدام الليمون , طلع اللون حلو و القوام ممتاز , الفكرة لفتت نظر ماما كتير و طلبت مني دورلها بالنت ع وصفة مشابهة و بعد ما عملتي لفة بهالنت اكتشفت إنو الأوربيين كلن بيستخدمو ليمون مع مربى الفريز يعني مو متل ما منطبخو نحن ناس بتحط ظرف جيلو , و ناس بتحطو ع الشمس ليسمك و الصراحة أنا كنت من الناس يلي بتحطو بعد الطبخ ع الشمس .

الصراحة بعد تجربة الوصفة مرتين كتير حبيتها , الليمون مع برش الليمون عم يضيفو طعم راااائع للمربى و هو يلي بيخلي المربى يحصل على قوامو المتماسك بدون جيلو و بدون شمس , بتذكر كنت كل سنة أنقذ طشت المربى من شلال الماء المتساقط لما بتشطف جارتي :)

المقادير :

2 كوب سكر ناعم الحبيبات

1 ليمونة حجم كبير

4 كوب فريز مقطع أرباع حسب حجم الفريز

الطريقة :

  1. يوضع طبق مسطح في الفريز و يترك يبرد لعدة ساعات ليبرد ( هذه الخطوة ستساعدك في اختبار نضج المربى ).
  2. تغسل الليمونة و تجفف و تبشر ثم تعصر و يصفى العصير .
  3. يوضع السكر في قدر و يضاف فوقه العصير و بشر الليمون و يرفع على نار خفيفة حتى يذوب السكر حوالي 10 دقائق ( في البداية قد يبدو لك أن السكر لن يذوب في الليمون لا تقلقِ ).
  4. يضاف الفريز و يحرك بين الحين و الأخر على نار خفيفة حتى يبدأ المزيج بالغليان ببطء ( ستلاحظين أن الفريز قد أطلق جزء من مائه ) .
  5. استمرِ بطبخ المربى حتى يتكاثف القطر ( شيرة المربى ) و لمعرفة ذلك أخرجِ الطبق من الفريزر و اسكبي القليل من الشيرة على الطبق و انتظر حتى تبرد إذا لاحظت أن القوام كثيف و شبه جيلاتيني هذا يعني أن المربى أصبح جاهز ( مع الأخذ بعين الاعتبار أن المربى سيصبح أسمك عندما يبرد تماماً ) أما إذا لم تحصلي على القوام المطلوب اعيدي الطبق إلى الفريزر و استمر بطبخ المربى على نار هادئة ثم اختبريه مرة أخرى .
  6. يجهز طشت مملوء بالماء البارد , يرفع القدر عن النار و يوضع في الماء البارد و يحرك المربى حتى يبرد ( انتبه إلى عدم تتطاير أي قطرة ماء لداخل قدر المربى حتى لا يفسد ) .
  7. بعد أن يبرد تماماً يعبئ في مرطبانات و يحفظ في الفريزر .

ملاحظات :

  1. استخدمي قدر كبير لطبخ المربى هذا سيساعد على تبخر السوائل أسرع .
  2. أهم نقطة في إعداد الوصفة هي طهي المربى على نار خفيفة حتى لا يحترق السكر .

 

6 تعليقات

  1. ما شاءالله عليكي ب تخلينا نتحمس لما نشوف أكلاتك الطيبة شكلو بيجننننن تسلم أيديكي

    • سها قمند

      الله يسلمك
      و هو المطلوب بحبكن تتحمسو و تعملو هالأكلات الطيبة للعيلة و تدعولي دعوة حلوة :)

  2. طريقتو جديدة علي انا بعملو نفس طريقتك الاولى بس بعد ما يستوي آخر غلوتين بضيف عصير ليمونة بدون برش وبيطلع كتير طيب وطبعا مابحط جيليه بس هي طريقتك جديدة بطبخ السكر لحالو بالاول تسلمي كتير وربي يعطيك ليرضيك

    • سها قمند

      الله يسلمك نوارتي , ربي يرضى علينا جميعاً
      إيه حبيبتي طريقتي القديمة هي الطريقة التقليدية يلي كل أهل حلب بيعملوها أنا ما عندي اعتراض عليها أبداً
      هي الطريقة حبيتها لأنو سريعة يعني بتطبخي المربى و بتعبي بنفس اليوم بدون ما يحتاج يتعرض للشمس عدة أيام
      و المميز فيها نكهة الليمون و البشرة , الفريز و الليمون كتير بيلبقو مع بعض , فيكي تجربيها المقدار صغير بيعملك مطربان صغير
      التكنيك متل ما قلتي جديد إنو نبدا بالسكر بالأول مندوبو مع الليمون , رح تحبيها كتير و لا تنسي تخبرينا برأيك يا عسل :)

  3. يسلم ايديكي سهى
    بصراحة فرحتي لاتوصف بوصفة المربيات لانه عنا بالسوق نادرا ما ألاقي مربى بدون جيلاتين والجيلاتين من منتجات الخنزير (( انتوا اكبر قدر )) يعني محرمات ، والمربى اللي عند الاتراك كتير كتير سكره بشكل غريب . لذلك يسلم ايديكي والله المربى من اساسيات الفطور والعشى عنا وازا فقد مشكلة الجبنة بتزعل منا

    • سها قمند

      و دياتك نتولة
      الله يكون بعونكن , معك حق كتير غربتلية بيعانو من هالمشكلة و في منهن بيعانو إنو مافي شمس إذا كانت المربى بتتطلب تنحط بالشمس متل مربى المشمش , لكن الحمد الله في بدائل .
      الأتراك بكل عام بحبو السكر يمكن لأنو بلادن باردة بالشتوية و بيحتاجو طاقة ليدفو جسمن
      أحيي العائلات يلي بتحب المربى و يلي بتهتم بوجبة الفور في كتير أطفال بستغرب كيف طالعين من البيت بدون فطور
      يلا جربيها و عطينا رأيك :)

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>