عمل الطحينة في البيت

طريقة عمل الطحينة في المنزل

يمكن في كتير أشخاص بيحبو يجربو يعملو هيك شغلات جنونية خاصة الغربتلية يلي ما كتير متوفرة الطحينة عندن , قبل ما أعمل هالوصفة بحبشت شوي بالنت و سألت عدة أشخاص لاحظت إنو الأغلبية عم يستعمل طحين لحتى يسمك قوام الطحينة جربت و طلعت طيبة بس في شي ناقص , كمان عملت منها فتة و غليتها مع اللبن ع النار , النتيجة ما كانت مرضية لأنو الطحين انطبخ و لطخت , بس قلت لحالي إلا الله يرزقني وصفة بس قررت هالمرة أرجع أجربها بكمية طحين أقل بس مع زيت السيرج و رحت لأشتري سيرج من بياع الحلاوة و قلت لحالي بسألو و مجرد ما قلتلو عملت طحينة بالبيت قلي : أكيد حطيتي طحين قلتلو : إيه ……ما لاقي إلا الزلمة انحر و انتفض و قلي : لك هاااااااد إسمو تخبيص ….تخبيص , بتوجعكن معدتكن , الطحينة ما بتصير بالبيت …قلتلو: ليش , قلي : نحن عنا ماكينات خصوصي بتطحن السمسم لحتى يطلع زيتو بالبيت ما بتنطحن هيك , طيب عمو: ليش لما منشتري طحينة بيكون في كبتولة بأرض العلبة , هي يا بنتي تفل السمسم …… أخدت قنينة السيرج و قلتلو شكراً بعد ما رفعتلو ضغطو و حريتو للزلمة و أنا طالعة رجع قلي لا بقى تعمليها بالبيت قلتلو : حاضر ……

رجعت ع البيت و جبت دقاقة الهبرة هي شفرتها قوية بس مو متل ماكيناتن قلت بضل بطحنها ليفرجها ربي و بساعدها بزيت السمسم , جربت و الحمد الله النتيجة مرضية نسبة لوصفة منزلية

المقادير :

200 غ سمسم أبيض

4 – 6 ملعقة كبيرة زيت السمسم ( سيرج )

الطريقة :

  1. حمصي السمسم في مقلاة غير لاصقة مع التحريك المستمر حتى يصبح ذهبي أشقر , مباشرة اسكبيه في طبق واسع و اتركيه حتى يبرد تماما ً .
  2. اطحني السمسم في محضرة طعام قوية و ذات شفرة فولاذية حتى يصبح كالمعجون ( هذه خطوة مهمة جداً للحصول على طحينة ناعمة الملمس ) أضيفي زيت السمسم بالتدريج مع تشغيل محضرة الطعام حتى تحصلي على القوام المطلوب , اسكبيها في مرطبان و احفظيها في البراد .

ملاحظة : عند طحن السمسم إذا ارتفعت حرارة محرك المحضرة دعيها تبرد و كرري العملية

 

    

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>