أقراص بعجوة بالطحين ( معمول التمر بالطحين )

معمول التمر بالطحين

لما يقرب العيد كل يوم بتلاقي في ريحة طيبة فايحة بالبناية , اليوم جارتنا يلي فوق عم تعمل معمول و كعك و امبارح كانو الجيران يلي مقابيلنا , الله يديم الأفراح بديار الناس آمين .

المعمول وصفة مشتركة بين عدة دول يعني بسورية و بلبنان و فلسطين و الأردن و كل بلد إلها طريقتها و طقوسها بتحضير المعمول حتى عنا بسورية , بحلب منحضرها بالسميد و بالشام بيعملوها بالطحين و في ناس بتحب تخلط سميد مع الطحين .

صرلي فترة مشتهية أعمل معمول بالطحين يدوب بالتم و يكون حبات صغيرة متل يلي منشتريها لما نسافر ع الشام , لحد ما شفت هي الوصفة جربتها و عجبتني كتيييير و جربتها بالماء و بالحليب و نص بنص ماء و حليب و  بآخر الوصفة بتشوفو ملاحظة عن نتائج كل تجربة و أي وحدة حبيتها أكتر , أتمنى تجربوها و تستمتعو فيها .

طريقة تحضير المعمول على الطريقة الحلبية ( بالسميد فقط ) هنا

المقادير :

العجينة :

1 كغ طحين خاص بالكاتو ( طحين متعدد الإستعمالات )

1 ملعقة صغيرة محلب مطحون

2 كوب سمنة

½ كوب ماء دافئ

½ كوب حليب دافئ

الحشوة :

½ كغ تمر مطحون ( عجوة )

2 ملعقة كبيرة سمنة

1 ملعقة صغيرة قرفة مطحونة

½ ملعقة صغيرة هال مطحون

أقراص بعجوة بالطحين

الطريقة :

  1. ينخل الطحين مع المحلب في وعاء عميق .
  2. يوضع السمن في قدر و يرفع على النار حتى يصبح ساخن جداً جداً( و هذه خطوة هامة ) , ثم يصب فوق الطحين و يقلب جيداً بالملعقة ثم باليد حتى تتوزع السمنة على كامل الطحين و يترك حتى يبرد حوالي 10 دقائق .
  3. يضاف الماء الدافئ و الحليب الدافئ و تعجن المكونات حتى نحصل على عجينة طرية , تترك لمدة ساعة ترتاح .
  4. يدعك التمر مع السمنة و التوابل جيداً , شكلي التمر على شكل حبل رفيع ثم قطعيه إلى قطع صغيرة و كوريها .
  5. قطعي العجين إلى أربع اقسام , ادعكي أول قسم ( اضيفي القليل من السمنة أقل من ملعقة طعام و ادعكي هذا سيسهل الأمر ) جهزي طبق فيه طحين , خذي قطعة صغيرة من العجين بحجم الجوزة شكليها على هيئة قرص صغير , ضعي كرة من التمر في وسطها و غلفيها بالعجين و كوريها بين راحتي يديك , إغمسيها بلطف بالطحين ثم ضعيها بالقالب , اضغطي بباطن كفك عليها لتأخذ شكل القالب , اضربي القالب على طرف المنضدة لتستخرجي حبة المعمول , رتبي حبات المعمول على صينية فرن .
  6. كرري العملية مع باقي أقسام العجينة .
  7. يحمى الفرن على درجة 180 مئوية و يخبز على الرف الأوسط لمدة 15 – 20 دقيقة حتى يصبح أسفله ذهبي أشقر أطفئي الفرن و شغلي الشواية حتى يشقر سطحه و ينضج .

ملاحظات :

  1. يمكن استخدام الفستق الحلبي المطحون بدلاً من التمر في الحشوة فقط إخلطيه مع القليل من السكر و السمن و ماء الورد .
  2. بالنسبة للسوائل المستخدمة في العجينة لقد قمت بتجربة الوصفة عدة مرات , مرة بالماء و مرة بالحليب و مرة بالماء و الحليب و في كل الحالات كانت رائعة الفرق فقط حسب رغبتك الحليب يجعلها تذوب بالفم أكثر أما الماء يجعلها تهرت أكثر بالنسبة لي وجدت خليط الماء و الحليب هو الأفضل و مناسب لكل الأذواق .
  3. هذا المعمول لا يحتوي على سكر في العجينة لذلك يرش بالسكر قبل التقديم لمن يرغب , و البعض يفضله بدون سكر و يكتفي بحلاوة التمر .
     

23 تعليقات

  1. يسلموووا ايديكي سها وتعيشي و تساوي شغلات طيبة و تعلمينا ياهن

    • سها قمند

      تسلميلي أحلى رفاه , الله يسعدك
      إنشاء الله بتعمليهن و بيكونو ع ذوقك و بتدعيلي

  2. فنااااانة ياسوسو بدي اجربا عالعيد انشالله تسلم الايادي ياقمر :)

    • سها قمند

      الفن كلو عندك لوليتي الحلوة
      بالتوفيق إنشاء الله حبيبتي , إنشاء الله رح تحبوها

  3. يسلمو شكلون كتييير بشهي ان شاء الله عالتجربة باقرب وقت واحلى الشي المقدمة اللي كاتبتبها استمتعت بقراءتها وجزاك الله خيرا

    • سها قمند

      صحة و هنا مقدماً نور
      انبسطت إنو المقدمة عجبتك , حبيبتي بانظار نتائج التجربة رح تدعيلي إنشاء الله

  4. رااائعة كعادتك .. مبدعة في كل شيء تسلم ايدك وحماك ربي من كل شر بحق هذا الشهر .. آمين

    • سها قمند

      الله يحفظك يا رب , و الله يجعلني عند حسن ظنكم دوماً و مبارك عليكي الشهر الكريم

  5. اذا بتريدي انا بالسعودية وبستخدم الطحين العادي الكويتي .. ياترى هاد هوه المقصود؟
    وياترى بقدر استعمل السمن النباتي ؟
    وشكرا كتير إلك .. شكل المعموﻻت بشهي كتير ياريت تجاوبيني لحتى أجربهن

    • سها قمند

      حبيبتي عنا بسورية مافي غير نوعين للطحين طحين الفرخة و طحين الكاتو
      و أنا استعملت النوع الثاني يعني طحين الكاتو يلي هو بيقابل بغير بلدان شي إسمو طحين متعدد الإستعمالات و إسمو بالإنكليزي ( All purpose flour )
      بالنسبة للسمن ممكن تستعملي السمن النباتي لكن لازم يكون نوعية فاخرة لأنو نوع السمن بيأثر على قوام المعمول و على النكهة أيضاً
      نورتي حبيبتي و أي سؤال من عيوني

    • شكرا كتير

  6. يسلموايديكي حبيبتي طريقتك حلوة وسهلة وانشالله بدي جربا

  7. بدي اسألك مابتحطي خميرة او بيكم باودر بالعجينة لانها مامكتوبة

    • سها قمند

      لا ما بحط لأنو مرة جربت مع خميرة أولاً خسرت الشكل الحلو للمعمول و ثانياً ما فرقت الطعمة يعني الخميرة ما زادت شي من الطعم

  8. السلام عليكم ِ
    ممكن تعطينا السمن بالغرامات ..وشكرا حبيبتي

  9. فيكي تكتبيلي طريقة عمل الناطف

    • سها قمند

      المقادير :
      2 كوب سكر
      ⅔ كوب ماء
      أقل من ربع ملعقة ملح الليمون أو 1 ملعقة كبيرة عصير ليمون
      2 بياض بيض بحرارة الغرفة
      رشة ملح
      رشة فانيليا
      بضع قطرات من ماء الزهر المركز
      الطريقة :
      1. يوضع السكر و الماء و عصير الليمون في كسرولة عميقة و يرفع على النار مع التحريك حتى يذوب السكر , عندما يبدأ المزيج بالغليان نتوقف عن التحريك , نخفض درجة الحرارة و يترك يغلي حوالي 10 دقائق في هذه الأثناء نغسل أطراف الكسرولة بفرشاة مبلولة بماء بارد أو بقطعة قماش مبلولة و لاختبار قوام القطر نسكب ملعقة صغيرة من القطر في زبدية ماء بارد إذا و نحاول أن نجمع القطر إذا تجمع بين أصابعك مثل الهلام هذا يعني أنه جاهز و إذا كان لديك ميزان حرارة للحلويات يجب أن تصل درجة حرارة القطر حتى 120 مئوية .
      2. بعد أن يبدأ القطر بالغليان يخفق بياض البيض مع رشة ملح و رشة فانيليا حتى يتكاثف جيداً و هذه خطوة مهمة .
      3. يصب القطر و هو يغلي على شكل خيط فوق بياض البيض المخفوق مع استمرار الخفق حتى تنتهي كمية القطر , يضاف ماء الزهر و نخفق .
      4. نستمر بالخفق حتى يبرد الناطف ثم يحفظ في وعاء محكم الأغلاق لحين الحاجة .

  10. مرحبا اخت سهى
    امبارح عملت معمول وما زبط وهلأ لحتى شفت طريقتك ورح جربها ان شاء الله
    بس عندي سؤال بالطريقة اللي جربتها ما حطيت لا خميره ولا باكينج باودر ومع هيك راحت الرسمة من على الوش
    يا ترى شو السبب ؟
    وكيف تشغيل الفرن لأفضل نتايج فوت وتحت مع بعض والا تحت اول او فوق اول ؟ ياريت تفيديني
    ويعطيك الف عافيه عالشغل الرائع

    • سها قمند

      يا هلا حبيبتي
      بالتوفيق إن شاء الله و بانتظار رأيك بعد ما تجربي الوصفة :)
      بالنسبة للوصفة يلي جربتيها ما بعرف شو النسب يلي استعملتيها بس احتمال يكون قالبك رسمتو بالأساس مو كتير واضحة , لأنو معلمين الحلو ما بيستخدمو إلا القوالب الخشب الزان يلي بتكون محفورة بشكل جيد
      بالنسبة للفرن أنا بحب اشغل عليهن من تحت و أخر كم دقيقة بشغل من فوق لياخد لون
      في ناس إذا مستعجلين و بدن يوفروا الوقت بشغلو الفرن فوق و تحت بس أنا بفضل ياخد راحتو بالخبز

  11. يعطيكي العافية سها
    كتير شكلهم مرتب وبشهي
    راح جرب وصفتك .. سؤال اذا حبيت اضيف سكر للعجينة
    هل بزبط ؟ لازم سكر مطحون او حبيبات ؟ وشو الكمية؟
    شكرا كتييير لمشاركتك الوصفة

    • سها قمند

      الله يعافيكي يا رب تسلمي
      أنا و لا مرة جربت أحط سكر للعجينة لأنو حشوة التمر حلوة و برش عليهم سكر بودرة
      بس أكيد بتصير إذا حطيتي سكر يكون بودرة
      بالتوفيق إن شاء الله

أضف رد على غدير إلغاء الرد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>