صمون بالحليب

صمون بالحليب

بعشق ريحة الخميرة و الخبز التازة يلي طالع من الفرن و مبتسم و كأنو عم يقلي كليني حبابة كليني , و لو مريت بالسوق من طرف أي مخبز لازم أمشي ببطء لاستمتع بريحة العجين المتخمر .

تخيلي إنك تحولي مطبخك لمخبز و تفوح منو الرائحة الطيبة و خاصة لما يدخلوهالكرات الحلوين على الفرن و يطلعو محمرين و ريحتن واصلة لعند الجيران , ما بعتقد في إنسان على وجه الكرة الأرضية ممكن يقاوم الخبز الساخن .

الوصفة بالأصل للمبدعة السيدة منال العالم , ممكن تشوفو الوصفة على الرابط ( هنا )

بالعادة كل ما أعمل هالوصفة بتاخد معي كوب حليب تماماً متل الوصفة الأصلية لكن الطحين من بلد لآخر ممكن يختلف , يعني في أنواع طحين بتمتص سوائل أكتر من أنواع ثانية و هالمرة احتاجت العجينة معي أكتر من كوب حليب بشوي .

في كتير صبايا و ستات بيخافو من العجين (طبعاً الإنسان عدو ما يجهل ) حتى تتخطي هيك مرحلة لازم تعجني كتير و مع الوقت بصير عندك خبرة و بتحبي العجين , أحياناً بحس إني مشتاقة أعجن و بحاجة لفرغ كل مشاعري بهالعجينة .

للصبايا المبتدئات بالعجين رح أعطيكي شوية أسرار من مطبخي او سميها ملاحظات :) , الغالبية العظمى من العجائن كلما كانت أطرى كلما كانت النتيجة أفضل إلا إذا ذكرت الوصفة إنو بدنا عجينة قاسية على سبيل المثال عجينة المعكرونة لازم تكون قاسية لأنو بعدين رح نسلقها بالماء .

كمان أنت و عم تعجني إذا حسيتي إنك عم تبذلي مجهود كبير جداً جداً و مرهق معناها عجينتك قاسية و بحاجة لمزيد من السوائل بالمقابل العجائن الطرية جداً متل البريوش مرهقة بالعجن لذلك الأفضل إنك تستخدمي عجانة أو إذا ما عندك عجنيها كم دقيقة و غطيها و ارتاحي 5 دقائق و ارجعي اعجنيها لأنوهالنوع من العجائن بحب المساج كتير قصدي العجن :D

لما تضيفي السوائل فوق الطحين و تبدئي بالعجن رح تكون العجينة بتلصق باليدين , لا تستعجلي و تضيفي طحين عجيني شي ثلاث أو أربع دقائق رح تشوفي العجينة ما بقت تلزق لأنو العجن بيخلي الغلوتن يلي داخل الطحين يشد و الغلوتن هو المسؤول عن قوام العجين .

أتمنى تجربوه الوصفة الرائعة و تستمتعو فيها على الفطور أنتو و العيلة .

صمون بالحليب

 

المقادير :

1 كوب حليب

½ كوب زبدة

4 كوب دقيق ( اتبع الطريقة الصحيحة لقياس المواد , الرابط هنا )

1 ملعقة صغيرة ملح

½ ملعقة صغيرة بيكينغ باودر

½ 2 ملعقة صغيرة خميرة فورية ناعمة جداً

¼كوب سكر

1 بيضة كبيرة

الطريقة :

  1. في وعاء على النار سخني الحليب مع الزبدة حتى تذوب الزبدة و يصبح الخليط دافئ ( دافئ و ليس ساخن ).
  2. في وعاء كبير ضعي الدقيق و الملح و البيكينغ باودر و الخميرة و السكر و اخلطي حتى تمتزج المواد جيداً .
  3. اضيفي الحليب المخلوط مع الزبدة و البيضة و اعجني حتى تحصلي على عجينة ناعمة و طرية حوالي 10 دقائق ( كلما كانت العجينة طرية كلما كانت النتيجة أفضل ) .
  4. توضع العجينة في وعاء مدهون بالزيت و تقلب داخل الوعاء حتى يتغطى سطحها بالزيت, تغلف بالنايلون و تترك في مكان دافئ حتى يتضاعف حجمها .
  5. جهزي صينية مستطيلة بقياس ( 40 سم × 30 سم ) و افرشيها بورقة زبدة .
  6. أضغطي على العجينة لإخراج الهواء الزائد منها ثم قطعيها بالسكين إلى 16 قسم متساوي ( لا تقطعي العجين باليد أبداً ) , كوري كل قسم براحة يدك حتى يصبح مثل كرة صغيرة و رتبي الكرات في الصينية على شكل أربع صفوف كل صف يحتوي أربع كرات , ثم غطيها بالنايلون و اتركيها في مكان دافئ حتى يتضاعف حجمها .
  7. سخني الفرن على حرارة 190 مئوية ( اتركيه 10 أو 15 دقيقة ليصل للحرارة المطلوبة ) , ادهني سطح الكرات بالزيت و اخبزيها على الرف الأوسط لمدة 20 -25 دقيقة أو حتى تصبح ذهبية اللون يمكن تشغيل الشواية آخر 5 دقائق , اخرجيها من الفرن و برديها على شبك .

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>