كاتو المانجا الطري بالبهارات ( كيكة الكاكا )

كاتو المنجا بالبهارات ( كاتو الكاكي )

واااو , كتير طيب , رااائع , بدي الوصفة , عبارات رح تسمعيها من ضيوفك لما يدوقو أول لقمة من هالكاتو الطيب يلي بيدوب بالتم .

أكيد رح تسألوني : سها شو طعمتو , كيف بتكون ؟

بصراحة مافيني أوصف النكهة , شي كتير طيب و مميز و ما بيشبه غيرو من الكيكات ( هالكيك بالذات مدلل على قلبي كتير ) .

إذا سألتي ضيوفك شو موجود بهالكيك ؟ الكل رح يقول في بهارات و مكسرات , بس في نكهة مميزة غير كيكة البهارات , أنت وحدك رح تعرفي شو المكون السري يلي عم يضيف نكهة مميزة للكيكة بالإضافة للطراوة الهائلة بالقوام .

هالكيكة بتعملك قالب بيكفي أكثر من 10 أشخاص , و القطع الزايدة ممكن تغلفيها بالنايلون الغذائي و تحفظيها بالبراد و رح تبقى طرية من 3 حتى 4 أيام و ممكن تقطعي الكيكة لحصص و ترتبيها بصحن و تغلفيها منيح بالنايلون و تحفظيها بالفريزر و لما يكون عندك ضيوف بتطالعي قطع الكيك حسب العدد يلي بتحتاجي و بتتركيها لتصير بحرارة الغرفة و بتقدميها .

بالعادة بقدم هالكيكة بدون أي كريما مع كاسة شاي رااائعة بكل معنى الكلمة , لكن ممكن إذا بتحبي تزينيها بالكريم شانتيه أو كريمة الجبنة .

قبل ما أتركن مع المقادير و الطريقة , نحن بحلب منسمي هالنوع الفواكة اللذيذة مانجا شتوية و في ناس بيسموها خرما أو ترابزون هورماسي و هي تسمية تركية ( Trabzon hurması ) و الإيطالين بيسموها كاكي أو كاكا ( cachi ) و هي صورتها حتى تكون الأمور واضحة بالنسبة للكل

ثمار الكاكاثمار الكاكي

المقادير :

1 كوب لب ثمار المانجا الشتوية  ( اختاري الثمار الناضجة )

2 ملعقة صغيرة بيكربونات الصوديوم ( كربونة )

2 كوب سكر ناعم الحبيبات

1 كوب زيت نباتي

4 بيضة بحرارة الغرفة

½ 1 ملعقة صغيرة قرفة مطحونة

½ ملعقة صغيرة جوزة الطيب مطحونة

¼ ملعقة صغيرة ملح

¼ ملعقة صغيرة فانيليا

ثلثي كوب ماء

3 كوب طحين ( اتبعي القاعدة العامة لكيل الطحين الرابط هنا )

1 كوب جوز مفروم

الطريقة :

  1. يدهن قالب مرتفع من الوسط بالزبدة جيداً ثم يرش بالطحين , يحمى الفرن على 175 مئوية و يثبت الرف في وسط الفرن .
  2. في محضرة الطعام نضع لب ثمار الخرما مع بيكربونات الصوديوم و نشغل المحضرة حتى تختلط المكونات , تترك ترتاح لمدة 5 دقائق ( ستلاحظين أن المزيج أصبح سميكاً )
  3. في وعاء عميق نخلط السكر مع البهارات و الملح و الفانيليا جيداً ثم يضاف الزيت و البيض و نخفق بخفاقة الكاتو حتى تمتزج الماد جيداً .
  4. يضاف لب الخرما مع الماء بالتناوب مع الطحين مع الخفق على سرعة منخفضة .
  5. يضاف الجوز المفروم و يقلب بملعقة أو سباتيول مطاطي و يصب المزيج في القالب و يخبز لمدة ساعة أو حتى ينضج ( اختبريه بعود كبريت ) .
  6. يخرج القالب من الفرن و يترك يرتاح على شبك ( ضمن القالب ) لمدة 10 دقائق , ثم يلب على شبك و يترك ليبرد تماماً .

يمكنكم مشاهدة طريقة عمل هذه الكيكة على قناة بيسكوتارت

 تطبيقات المتابعين :

أشكر السيدة شهود همدواي لمشاركتنا صورة تطبيقها للوصفة و ألف صجة و هنا

تطبيق السيدة شهود هنداوي

5 تعليقات

  1. السلام عليكم و رحمة الله
    لو سمحتي شو الفرق بين بيكربونات الصوديوم و البيكينغ باودر ؟
    و فيني استخدم بهالوصفة البيكينغ باودر بدل بيكربونات الصوديوم ؟
    و شكراً لإلك :)

    • سها قمند

      و عليكم السلام و رحمة الله و بركاته
      سؤال حلو كتير الإثنين عبارة عن مساحيق رافعة للعجين لكن في اختلاف بالتركيب الكيميائي لكل مادة
      بيكربونات الصوديوم هي إحدى المكونات المستخدمة لعمل البيكينغ باودر لأن البيكينغ باودر يحتوي على نسبة من بيكربونات الصوديوم مخلوطة مع كريم التارتار ( نوع حمض جاف ) بالإضافة لكمية من النشاء , وظيفة النشاء الحفاظ على جفاف المواد و منع الرطوبة .
      يعني بيكربونات الصوديوم ما فيها حمض بينما البيكينغ باودر فيها حمض , بيكربونات الصوديوم تتفاعل مع الحمض و تطلق غاز يساهم في رفع العجين لذلك كل الوصفات التي تحتوي على بيكربونات الصوديوم يجب أن تحتوي تلك الوصفات على عنصر حمضي مثل اللبن الزبادي أو البتر ميلك و في هذه الوصفة تحتوي ثمار الكاكا على العفص و هو أحماض فينوليه
      طولت عليكي لكن حبيت وضح الفكرة
      بهي الوصفة لا يستخدم البيكينغ باودر حصراً يستخد بيكربونات الصوديوم , ممكن تشتريها من الصيدلية أو من عند أي عطار

    • لا طولتي ولا شي و شكراً على الشرح المفصل
      يا خسارة كنت بدي جرب هالكيك هلأ
      رح انتظر لبكرا و دور على بيكربونات الصوديوم لأن أنا بتركيا و ما بعرف فين ممكن لاقيه بالضبط
      شكراً مرة تانية :)

  2. ممكن أسأل مرة تانية ؟
    ليش لون الكاتو غامق مع انو ما في كاكاو ؟
    و فيني احذف الجوز من دون ما عدل باقي المقادير ؟
    و كيف فيني أعرف حجم القالب المناسب؟
    آخر سؤال الكوب بالنسبة للطحين كم ملعقة ؟ لأن ما عندي كوب مقاسه 250 مل :\
    بانتظار ردك لأن بدي جربه اليوم

    • سها قمند

      الكاتو غامق لأنو فيو قرفة و جوزة الطيب و تاني شي بيكربونات الصوديوم بتعمل لون دهبي
      ممكن تحذفي الجوز بدون ما تعدلي بالمقادير

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>