مافن الفانيليا مع حبيبات الشوكولا

مافن الفانيليا مع حبيبات الشوكولا يسعدلي أوقاتكم حبايبي متابعي بيسكوتارت
مع قدوم الخريف ما بعرف ليش بزيد ضغط الشغل و كأنو أنا بالصيف كنت قاعدة و لافة رجل على رجل , بهالشهر بالذات بيطلع شغل شي بتتوقعي و شي بيفرض نفسو فرض و كلو مطلوب منك و لحقي إذا بتلحقي يا شطورة
المدارس بتبدا و صار لازم ألتزم بالدوام مع الطلاب و من جهة لازم رتب و نظف شغلات ضرورية بالبيت استعداداً لفصل الشتاء , دورات الحلويات لازم تابع مع الطالبات و بنفس الوقت ما لازم أنسى قطعة من قلبي و هو موقع بيسكوتارت
من فترة بعد ما نشرت وصفة مافن الشوكولا بدون بيض طلبت مني إحدى المتابعات وصفة مافن فانيليا مع حبيبات الشوكولا و وعدتها إني نزل الوصفة و مصورة فيديو , صحيح اتأخرت شوي لأنو متل ما حكيتلكن ضغط شغل كبير إلا إني و لله الحمد وفيت بوعدي .
نجي للوصفة هي الوصفة من أطيب وصفات المافن يلي ممكن تتذوقوها و الحلو إنها سهلة جداً حتى الأطفال فيهن يعملوها و هي فرصة حلوة لتشاركي اطفالك بنشاط ممتع رح يحبو و يحببهم بالطبخ

فيديو الوصفة بتلاقو على قناة Biscotart على اليوتيوب و بالمناسبة لا تنسوا تشتركو بالقناة و تفعلوا زر الجرس لتوصلكن كل الوصفات الجديدة .

المقادير :
110 غ زبدة مذوبة و مبردة
2 حبة كبيرة بيض
ثلثي كوب حليب
1 باكيت فانيليا
2 كوب طحين ( تعادل 250 غ )
½ 2 ملعقة صغيرة بيكنغ باودر
رشة ملح
ثلثي كوب سكر
نصف كوب حبيبات الشوكولا
الطريقة :
1. يحمى الفرن على 190 مئوية و يثبت الرف الأوسط في الفرن , نجهز صينية كب كيك بورق الخاص بالكب كيك .
2. في وعاء كبير نضع السكر و ينخل الطحين . البيكنغ باودر و الملح فوقه , نحرك بمضرب يدوي حتى تتجانس المواد .
3. في وعاء أخر نضع الزبدة المذوبة و المبردة , نضيف الحليب و البيض و الفانيليا و نقلب بمضرب يدوي حتى تتجانس المواد .
4. نسكب خليط المواد السائلة فوق خليط المواد الجافة و نحرك بمضرب يدوي حتى تتجانس المواد فقط , نضيف حبيبات الشوكولا و نحرك حتى تتوزع جيداً .
5. يعبئ الخليط في كيس كريما و يقص طرفه , يوزع الخليط بالتساوي على أكواب الكب كيك .
6. تخبز في الفرن لمدة 18 أو 20 دقيقة يمكن تشغيل الشواية في الدقائق الثلاث الأخيرة , اختبريه بعود كبيريت .
7. يخرج من الفرن و تترك الصينية 5 دقائق على الرف الشبكي لتبرد ثم تخرج حبات المافن من الصينية و ترتب على رف شبكي و تترك حتى تبرد تماماً .

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

error: Content is protected !!