مربى الحليب وصفة قريبة من الحليب المكثف المحلى , بس بتكون أسمك و فيها طعمة كرميل لذيذة و بدوب بالتم يعني شي قريب من صوص التوفي , ممكن تاكليها متلي من المرطبان مباشرة أو تستعمليها للكيك و البوظة أو حسب ما تحبي أطلقي العنان لمخيلتك , أهم شي إنو الحليب ينطبخ على نار خفيفة حتى ما يطلع في كتل بس طبعاً رح يستغرق معك وقت أطول , و كلما أخد وقت على النار أكتر كلما صار أسمك و تعززت نكهة الكرميل أكتر .
أثناء طبخه لازم تكوني متفرغة لأنو بيحتاج تحريك و مراقبة حتى ما يعلق بالطنجرة أن بقعد جنبه بحطلي شي شغلة أتسلى فيها و بضل رايحةجاية عم حرك و أكيد عم دوق و دوب حنين 🙂 .
بالوصفة رح تشوفوا إني استخدمت بيكربونات الصوديوم و نحن متعودين نستخدمها مع بعض أنواع الكيك أو لسلق البقوليات و يمكن أول مرة بستمعوا باستخدامها بهيك وصفات رح أشرح شوي عنها لأنو الطبخ مو مجرد وصفة ناجحة و بس من وجهة نظري الطبخ ثقافة و معرفة .
من حيث الطعمة بيكربونات الصوديوم ما بيعمل مرار خاصة إنو بيكربونات الصوديوم منستخدمها بكتير أنواع من الكيكات لذلك لا تخافو منها , أما فائدة البيكربونات بهالوصفة هو إنو الحليب بيحتوي على بروتينات و مع مدة الغلي الطويلة لحتى نحصل على طعم الكراميل رح تتخثر هالبروتينات و تعطي المزيج قوام غير محبب , بيكربونات الصوديوم رح تسيطر على تخثر هالبروتينات و تعطينا قوام ناعم كمان بتساعد بإعطاء هاللون الحلو لمربى الحليب و من هالمنطلق في نوع خبز ألماني إسمو بيغل قبل ما يخبزو بالفرن بيسلقو في ماء مع بيكربونات الصوديوم مشان لما ينخبز بالفرن يا خد لون حلو.
المقادير :
1 ليتر حليب
¼ 1كوب سكر
½ ملعقة صغيرة ملح
¾ ملعقة صغيرة بيكربونات الصوديوم
1 ملعقة صغيرة فانيليا
الطريقة :
1. يوضع الحليب و السكر و الملح في وعاء عميق و كبير و سميك القعر, يرفع على نار متوسطة حتى يغلي مع التحريك كل 5 إلى 10 دقائق .
2. عندما يغلي الحليب تخفف النار جداً و تضاف بيكربونات الصوديوم مع التحريك سيبدأ المزيج بالفوران قليلاً لذلك استعملي قدر عميق .
3. يترك على نار خفيفة حوالي الساعة بدون تغطية مع التحريك بين الحين و الأخر , مع مرور الوقت ستلاحظين أن المزيج بدأ يتغير لونه ( لاحظي الصور ).
4. يمكنك التحكم بقوام المزيج ( القوام السائل يستخدم كصوص مع الكيك و البوظة أما السميك فيستخدم مثل الشوكولا الدهن أو في بعض الوصفات مثل الكوكيز و الجيز كيك ), اسكبي ملعقة صغيرة على طبق بارد , إذا كان سائلاً استمري بطبخه , أما إذا كان القوام جيد يبعد عن النار, تضاف الفانيليا و يحرك بالمضرب اليدوي حتى يصبح ناعم و لامع . 
5. يعبئ في مرطبان نظيف و يترك يبرد بدون غطاء , ثم يغطى و يحفظ في الثلاجة لحين الحاجة .
ملاحظات :
1. في المراحل الأخيرة من الطبخ يحرك كل 5 دقائق أو حتى أقل حتى لا يعلق المزيج بقعر القدر , لذلك من الأفضل أن تكون متفرعة حين إعداده .
2. كلما برد المربى كلما أصبح أسمك .
3. استعمال قدر عميق و كبير يساعد على تبخر السوائل بشكل أسرع مما يوفر وقت الطهو .
روعة وأول مره بسمع فيها ، والشرح كافي ووافي ، وأعجبتني جداً جملة إن الطبخ ثقافة ومعرفة قبل مايكون وصفة مكتوبة والسلام ، ما أدري أنا شفت على مواقع الطبخ صلصة اللوتس ، اللي من مكوناتها بسكويت اللوتس المطحون اللي بينضاف في النهاية ، وعليها طلب كبير ، فنادراً ماتكون متوفرة ، وإذا توفرت تخلص الكمية بسرعة البرق ، أتوقع كأنها نفس مربى الحليب ونفس القوام شبه سائلة ، وإن شاء الله رح أستبدل صلصة اللوتس بمربى الحليب ، لأن حبيت الوصفات بس ماقدرت أعملها لعدم توفر الصلصة ….
هاد شعاري من زمان لهيك في قسم بالموقع للمقالات إنشاء الله في الفترات الجاية رح ضيف عليه موضيع جديدة 🙂
سؤال بسيط بعد مايجهز المربى ، كم الكمية الناتجة من لتر الحليب ، وشكراً ….
حبيبتي أنا بعبي بمرطبان الفطر الوسط يعني تقريباً ممكن نقول حوالي كوب و نصف