كبة بالسياخ مطجنة أول مرة دقتها كانت عند رفيقتي مجيدة , رفيقتي من أيام الدراسة ( الأيام الحلوة ) و كانت والدتها عاملة هالأكلة
طبعأً مباشرة سألت عالمقادير و الطريقة و أنا بتشكرها كتير لأنو عطتني المقادير بكل صدق و أمانة و الحقيقة إنو ما بتبخل أبدأ بأي معلومة .
كتير بحترم الناس يلي بيعطوا من كل قلبهن بدون ما ينتظروا مقابل , أحياناً بلتقي بناس إما ما بيعطوا الوصفة أو بيعطوها غلط مشان تجربيها و ما تنجح معك و هيك بيضمنوا إنو ما تعودي تفكري مجرد تفكير إنك تطلبي منهن وصفة مرة ثانية
و في ناس من نوع تاني بطلبوا منك وصفة و طبعاً من كل طيبة خاطر بتعطيهن و لما أنت بتحتاجي شو بيقولوا الدفتر ضاع أو عرتو لفلانة و ……….إلخ مبررات كتيرة .
فشتلكن قلبي ,خلونا نرجع لوصفتنا الذيذة كبة بالسياخ مطجنة ممكن تكون مشوية ع الفحم أو بفرن البيت بس ع الفحم أطيب بكتير و صحة و عوافي مقدماً .
ممكن تشتري الكبة جاهزة من القصاب أو تعملي كبة بالسياخ على طريقتي و بتطلع روعة
بالعادة بعمل كمية من الكبة بالسياخ نص مناكلها جنب السلطات و المخللات و النص الثاني بعملو كبة بالسياخ مطجنة .
المقادير :
5- 6 بصلات
½ كوب زيت زيتون ( أو مزيج من زيت الزيتون و زيت نباتي حسب الرغبة )
3 ملعقة عارمة دبس فليفلة ( كمية دبس الفليفلة حسب الرغبة و حسب درجة نكهة الحر فيها )
كوب ماء
1 مكعب مرق الدجاج
1 كغ كبة بالسياخ مشوية
طريقة كبة بالسياخ مطجنة :
1 – يقشر البصل و يفرم جوانح .
2- يحمى الزيت في طنجرة عميقة ثم يضاف البصل و يقلى مع التحريك حتى ينضج .
3- نضيف دبس الفليفلة و يقلى مع البصل قليلاً ثم في الأخر نضيف كوب الماء و مكعب مرق الدجاج .
5-يترك المزيج على النار مع التحريك من حين إلى الأخر حتى يذوب مكعب مرق الدجاج .
6- تضاف الكبة إلى المزيج السابق ثم تترك حتى تتشرب النكهات مع التحريك بلطف حتى لا تتفتت الكبة , باللهجة الحلبية نقول ( تنسيف ) .
