ليالي لبنان

ليالي لبنان مكوناتها سهلة و بسيطة و متوفرة بكل بيت .

أغلب الناس بيزينوها بالفستق الحلبي بس أنا بحب ازينها بالموز جربوها بالموز و رح تعتمدو هالوصفة دوما

من أكتر من أسبوعين و لحد اليوم و في بداخلي شعور بالحنين للمعجنات و الحلويات و خاصة الوصفات يلي كنت أعملها زمان

أيام الجامعة .

بدون شعور بسحب وراقي القديمة و بقعد بقلب بالوصفات , ما بعرف إذا هالحنين يلي بداخلي للوصفات بحد ذاتها و لا للذكريات الحلوة و لرفقاتي و جمعتنا و ضحكاتنا , يمكن عم حاول رجع هديك الأيام بس بقرارة نفسي بعرف لا يمكن ترجع …… بذكر بعد التخرج بكم سنة زرت الكلية لحتى أخد كشف علامات حسيت حالي بغير كوكب و بغير عالم رغم إنو الحيطان متل ماهي و الدرج يلي كنا نطلع عليه بعدو ع حالو , القاعات ما تغير فيها شي بس حاسة بغربة وقتها عرفت إنو يلي بيرسم اللحظات الحلوة مو بس المكان , الأشخاص يلي عاشو بهالمكان , حسيت حالي مشتاقة لدفعتي كلها رغم إنو كنا كتار و ما منعرف بعضنا .

وصفة ليالي لبنان كانت من هديك الحقبة الزمنية و دائماً كنت أعملها ليش يا حزركن ؟؟ ……. لأنو ما فيها تعقيد حتى الصبابا الصغار يلي طالعين على الدنيا جديد ممكن يحضروها بكل بساطة .

المقادير :

طبقة السميد :

1 كوب سميد خشن

5 كوب حليب

3 ملعقة كبيرة سكر

طبقة الكريما :

1 علبة كريما بودرة ( بودرة كريم شانتيه )

¾ كوب حليب بارد

1 علبة قشطة

للتقديم :

قطر

موز

الطريقة :

1. يوضع الحليب في قدر عميق و يضاف السكر و السميد و ترفع القدر على النار مع التحريك المستمر حتى يسمك المزيج و ينضج السميد , يصب المزيج في وعاء كبير مستطيل الشكل (أو جات بايركس كبير ) , تترك حتى تبرد تماماً .
2. تخفق الكريما مع الحليب البارد حتى تتكاثف جيداً ثم تضاف القشطة و نخفق حتى تتجانس المكونات و تمد فوق خليط السميد البارد .
3. عند التقديم يقطع الموز شرائح و تصف فوق الكريما و يقدم مع وضع القطر في وعاء أخر بجانب الطبق ليضيف كل شخص من القطر حسب رغبته .

ملاحظات :

1. تزين بالموز قبل التقديم مباشرة حتى لا يتغير لونه .
2. لا تسكبي القطر فوق الحلوى قبل تقديمها و إلا سيتشرب السميد القطر و يفسد شكل الحلوى .