كيف تصنعين خلطة الزعتر الحلبي في البيت

تشتهر مدينة حلب بصناعة الزعتر الحلبي فكل من يزور هذه المدينة لابد أن يحمل معه الزعتر كهدية لأهله وأقاربه وأصدقائه، يعتبر الزعتر من أشهر المواد الغذائية التي تقدم على فطور الصباح مع زيت الزيتون و الخبز السوري و كوب من الشاي .

الزعتر يمكننا أن نصفه باختصار بأنه تراث حلبي بامتياز نظراً لشهرة مدينة حلب بهذه الصناعة التي تكاد تكون حكراً عليها، وقد اشتهرت عدة عائلات بـحلب منذ عشرات السنين بصناعة الزعتر نذكر منها عائلة الناصر و كسحة .

الزعتر الحلبي مرتبط بذاكرتي بسوق المدينة القديم , السوق المغطاة بالحجر العتيق مع الفتحات الصغيرة يلي بتسمح لأشعة الشمس تلامس البلاط , المحلات المتلاصقة بدون أي ديكور أو أضواء صناعية تشد انتباهك , البضاعة الجيدة و صوت الباعة هنن وسيلة الترويج الوحيدة .

بتعرفو البهو الملكي يلي بيكون موجود بأي قصر لاستقبال الزوار ,  سوق العطارين بحسو البهو الملكي للسوق القديمة لأنو محطة كل زائر بحكم موقعه بين سوق العبي و سوق السقطية .

كنت كتير أستمتع بالدخول لسوق العطارين من طرف سوق النسوان و أنا عم أتفرج ع النسوان يلي جاية تشتري جهاز العروس و لف ع اليمين لحتى تبدأ روايح البهارات تفحفح من الدكاكين و هيك لأوصل لقبل آخر السوق بشوي كان في دكانة عطارة مميزة جداً صاحبها مزينها بنجوم البحر المحنطة إذا كنت ابن حلب رح تتذكرها أكيد , هي كانت محل عطارة بيت النعال .

كنت أشتري البهارات من عندو و كل سنة بموسم الزعتر الأخضر بعد ما حضرو و نشفو بالبيت أوزنو و روح لعندو لحتى أشتري بقية المكونات , طبعاً هو كان يوزن العيارات حسب كمية الزعتر الأخضر يلي عندي .

و هيك كل سنة إلي زيارة للمدينة خص نص للزعتر الحلبي ( طبعاً ما تفتكرو إني بزور السوق القديمة بالسنة مرة , لا المدينة عشقي الحقيقي و إلي فيها ذكريات حلوة ) , مرة من المرات خطر ببالي أسألو عن الوصفة و عطاني المقادير بكل طيبة خاطر , طبعاً المقادير يلي رح تشوفوها بالوصفة بتكفي مونة السنة كلها للعيلة .

و بما إنو كل عطار إلو لمساتو الخاصة بتحضير الزعتر حبيت أسأل عطار تاني فسألت السيد عدنان بهاية و قلي المقادير يلي عندك مقادير شخص معلم و أضاف على الخلطة فقط الفستق العبيد و عطاني ملاحظة رح أذكرها بأخر الوصفة .

قناة سما استضافت السيد عدنان بهاية ليحكيلنا عن الزعتر الحلبي و الصابون الحلبي ممكن تشوفو اللقاء على الرابط ( هنا )

المقادير :

250 غ شمرا

250 غ يانسون

250 غ كزبرة

100غ كمون

½ كغ زعتر أخضر ( يغسل و ينشف في المنزل ثم يفرك براحة اليد ليصبح ناعم )

½ كغ قضامة

½ كغ فستق عبيد محمص

½ كغ سماق مطحون ( أكثر حسب الذوق )

ملح الليمون

ملح حسب الذوق

2 كغ سمسم محمص ( أكثر حسب وزن الخلطة )

الطريقة :

1. تنقى البهارات من الشوائب كل على حدا ( الشمرا , اليانسون , كزبرة , كمون ) تنقى القضامة أيضاً.
2. تحمص البهارات كل على حدا باستخدام مقلاة تفال ( مع الانتباه إلى تحميصها بشكل جيد دون حرقها ) تترك جانباً لتبرد .
3. يفرك الفستق العبيد باليد حتى يتخلص من قشوره .
4. تخلط البهارات مع القضامة و الفستق العبيد و تطحن عند العطار .
5. يضاف الزعتر الأخضر الناشف و السماق المطحون و السمسم إلى خلطة البهارات المطحونة و يحرك جيداً ثم يضاف الملح و ملح الليمون حسب الرغبة .
6. تعبئ في مرطبانات محكمة الإغلاق و تحفظ في الفريزر .

ملاحظات :

1. كمية السماق المذكورة في الوصفة قابلة للزيادة حسب رغبت كل شخص .
2. يمكن إضافة القليل من الفستق الحلبي المبشور .
3. يفضل طحن ملح الليمون بمحضرة الطعام قبل إضافته .
4. نصيحة تعلمتها من السيد عدنان بهاية , لضبط كمية السمسم في الخلطة توزن جميع مقادير مكونات الزعتر و بنفس الوزن يضاف سمسم محمص .
5. نصيحة تعلمتها من والدتي حفظها الله , احتفظي بخلطة البهارات بدون إضافة السمسم , ثم أضيفيه أثناء العام لكل ربع كغ أو نصف كغ من خلطة البهارات حسب استهلاك العائلة و ذلك لأن السمسم هو المكون الوحيد الذي لا يطحن لذلك يصعب توزيعه و خلطه جيداً و في نهاية العام لن تصبح خلطة الزعتر لديك فقيرة بالسمسم .

إذا أعجبتك هذه الوصفة و رغبت في مشاركتها مع عائلتك و أصدقائك لطفاً اضغط على أحد أزرار التواصل الاجتماعي في الأسفل

[facebook] [tweet] [Google] [pinterest] [follow id=”biscotart” ]