مبروشة بمربى الورد ( حجار القلعة )

المبروشة أو حجار القلعة من الحلويات المشهورة داً بالعالم العربي , الجديد بهذه الوصفة هو استخدام مربى الورد بالحشوة سيعطيها طعم مميز سيدهشك

المبروشة أو حجار القلعة من الحلويات المشهورة داً بالعالم العربي .

الجديد بهذه الوصفة هو استخدام مربى الورد بالحشوة سيعطيها طعم مميز سيدهشك

مربى الورد إحدى الوصفات التي تشتهر بها مدينة حلب , و السياح لما بيدوقوا هالمربى بيحبوها كتير و بيستغربوا إنو الورد بينعمل مربى  , طبعأً مو أي ورد رح يكون صالح لحتى ينعمل منو مربى في نوع خاص من الورد ينبت بشهر أيار و بهالشهر لما بتمشي بأسواق المدينة بتشوف البياعين حاطين هالورد و عم ينادوا عليه للبيع و لما منشتريه رائحة البيت كلها بتصير حلوة و بتحسي بالانتعاش .

طبعاً ممكن تستعملوا أي نوع مربى مفضل عندكم بس إذا جربتوها مع مربى الورد رح تحبوها كتير و رح تحبو شغلها لأنو و أنتو عم تشتغلو رح تستمتعوا بريحة الورد و لا يمكن تقاوموا هالريحة .

لما كنت عم صور الوصفة ما تمالكت نفسي و أكلت كم حبة و ما رح قول كم حبة خلوها سر 🙂

المقادير:

3 بيضة

¾  كوب سكر ناعم

1 ظرف فانيليا

¾ كوب زبدة مذوبة

2/1 2 كوب طحين ( تراعى القاعدة العامة لقياس المقادير هنا )

2 ملعقة صغيرة بيكنج باودر

رشة ملح

للحشوة :

كوب و ربع مربى الورد ( الوصفة هنا )

الطريقة :

1. تدهن صينية بايركس مقاس ( 25 * 30 ) سم بالزبدة و ترش بالطحين ثم يحمى الفرن على 180 مئوية .
2. ينخل الطحين مع البيكنج باودر و الملح ث يترك جانباً .
3. في وعاء كبير يخفق البيض مع السكر و الفانيليا حتى يذوب السكر حوالي 2 – 3 دقيقة .
4. نضيف الزبدة المذوبة و نخفق حتى تمتزج المكونات .
5. نضيف الطحين و نحرك باليد حتى تندمج المكونات و نحصل على عجينة لينة تلتصق باليد .
6. يؤخذ قسم من العجينة بحجم البرتقالة و يترك جانباً تمد باقي العجينة في الصينية المجهزة و نحاول أن نمد العجينة على الأطراف أيضاً بارتفاع 2 سم تقريباً ( إذا كانت العجينة تلتصق باليد كثيراً استعيني بقطعة من النايلون لمد العجينة أو ضعيها في البراد لمدة 30 دقيقة ).
7. نوزع المربى على العجينة .
8. تضاف من 2 إلى 3 ملعقة كبيرة من الطحين إلى العجينة المتبقية .
9. تعجن جيداً ثم تبشر بمبشرة الجبنة و توزع فوق المربى .
10.  تخبز في الفرن الحامي حتى تصبح ذهبية اللون من جميع الأطراف .
11. تترك لتبرد تماماً ثم تقطع مربعات و تقدم .