أكلة تركية لذيذة كتير البعض بيعرفها و البعض الأخر يمكن تكون جديدة عليه , الإسم بالتركية ( karınyarık ) على الغوغل بتشوفو كلمة وحدة لكن هو عبارة عن كلمتين (karın ) معناها بطن و (yarık) معناها شق و هالتسمية مأخوذة من طريقة تحضير الباذنجان لأنو رح نعمل شق ببطن الباذنجانة ونحشيه بحشوة اللحمة و الفليفلة يعني نفس طريقة حشو المكدوس >
هالأكلة بحبها كتير و تعلمتها من والدتي يلي اتعلمتها من جدتي الله يرحمها , في أتراك بيستعملو توم بالحشوة جدتي ما كانت تستعمل و لا أنا حاليا ما بستعمل أنتو أختارو يلي بيناسبكن .
هالأكلة بحسن قول عنها أكلة لذيذة و إقتصادية و مرنة , الطعم ما رح أحكي عنو لأنو من المكونات ممكن تعرفو أديه طيب و إقتصادية لأنو ما بتحتاج كمية كبيرة من اللحمة للحشو و مرنة لأنو فيكون تعملوها بالفرن أو على البوتغاز , بالصيف ممكن تحطي بندورة معصورة للصوص إذا ما توفرت البندورة بتحطي معجون الطماطم يعني حسب المتوفر بالبيت .
المقادير :
½ 2 كغ باذنجان تاتفي أو حارمي متوسط الحجم
زيت لقلي الباذنجان
1بصلة كبيرة
250 غ لحمة مفرومة
1 حبة كبيرة فليفلة خضراء مفرومة
1 حبة كبيرة فليفلة حمراء مفرومة
1 بندورة كبيرة مقشرة مفرومة ناعم أو مبشورة
2 فص الثوم ( مهروس ) أختياري
ملح و بهار حلبي حسب الرغبة
1 ملعقة كبيرة سمنة
للتزين : بندورة مقطعة جوانج
المرق :
ماء حسب الحاجة
2 -3 ملعقة معجون الطماطم
ملح
الطريقة :
- يغسل الباذنجان و يترك يجف , يزال الساق الأخضر و أطراف الكأس بحيث يصبح مثل الصورة ثم يقشر درب و درب .
- يقلى بالزيت الساخن ( نصف قلي ) و يرفع على ورقة مطبخ .
- تحضير الحشوة : تسخن السمنة في مقلاة و تضاف البصلة و تقلى حتى تصبح شفافة ثم تضاف اللحمة و تقلى حتى تنضج ثم تضاف الفليفلة و تقلى ثم تضاف البندورة و الثوم في حال استخدامه , تترك على نارخفيفة حتى تجف السوائل مع التحريك بين الحين و الأخر ثم تتبل بالملح و البهار .
- تجهيز الوصفة : بطرف الإبهام نعمل شق على طول الباذنجانة و يوضع قليل من الحشو فيه و يصف في صينية فرن و تكرر العملية حتى تنتهي كمية الباذنجان , تزين كل حبة باذنجان بشريحة بندورة أو فليفلة .
- تخلط مكونات المرق و تسكب فوق الباذنجان بحيث يصل إلى مستوى ارتفاع حبات الباذنجان , تغطى الصينية بورق القصدير مع عمل عدة فتحات في الورقة ليخرج البخار و توضع في الفرن حتى تنضج و يقدم بجانب الرز المفلفل مع الصوص اللذيذ .
ملاحظات :
- لأشخاص الذين لا يحبون استخدام الفرن يمكن وضع الصينية على نار الغاز ( نار خفيفة ) .
- إذا تبخر أغلب الماء و لم ينضج الباذنجان يضاف المزيد من الماء .
- يمكن تحضير الباذنجان و قليه و حفظه في الفريزر لوقت لاحق , و عندما تحتاجينه اتركيه في المطبخ حتى يفك عنه الثلج و حضري الحشو في هذه الأثناء و أكملي الوصفة .
