رز بالكاري و الخضروات

في أكلات بحسها معشعشة جواتي و بتمشي بدمي يمكن مو بس لأني بحبها لأنها بتذكرني بطفولتي , لما أرجع من يوم طويل بالمدرسة و المعلومات عاملة عرس و دبكة براسي و أدخل ع البيت و تكون ماما عاملة رز بالكاري و جنبو صحن سلطة أو مخلل أو عيران , يعني شو بدي مكافأة أحلى من هيك طبق بلون الدهب و الخضار موزعة في كأنها جواهر .

في عائلات بتحب تطبخ الخضار مع الكاري لوحدها و بتقدم جنبها رز يعني متل البامة أو الفاصوليا و جنبها رز , بالنسبة إلي بحبها هيك مخلطة مع بعضها و الرز أخد هاللون الأصفر الحلو و شبعان من نكهة البهارات الطيبة .

ممكن تعمليها باللحمة المفرومة أو متل الوصفة بالدجاج حسب المتوفر بالبيت أو حسب زوق عيلتك و حتى مقدار بهارات الكاري فيكي تزيدي أو تنقصي حسب رغبتك .

المقادير :

½  كوب زيت زيتون

3  بصلة كبيرة مفرومة

¾  كغ جزر مقطع

½  كغ فليفلة خضراء أو حمراء ( يفضل النوع الحار )

1  علبة فطر مقطع ( مصفى )

½  كغ  بازلاء مسلوقة أو معلبة

½ كغ صدور دجاج

2 ملعقة كبيرة بهارات كاري

2 كوب رز مصري ( حبة قصيرة )

2 ملعقة كبيرة سمنة

ماء لسلق الدجاج

الطريقة :

1. يغسل الدجاج جيداً و يوضع في قدر عميق و يغمر بالماء و يرفع على النار حتى يغلي , يرمى ماء الغلي و يستبدل بماء آخر جديد و يرفع القدر على النار , أضيفي ورقتي غار و عود قرفة و قليل من جوزة الطيب المبشورة و بضع حبات قرنفل و اتركي الدجاج يغلي حتى ينضج , يصفى و يفتت باليد ( يحتفظ بماء السلق لطبخ الأرز ) .
2. ينقع الرز بماء ساخن مع ملعقة صغيرة ملح .
3. يسخن زيت الزيتون في قدر عميق و يضاف البصل المفروم و يقلى مع رشة ملح حتى يطرى , يضاف الجزر المفروم و يقلى حتى ينضج ثم تضاف الفليفلة و تقلى ثم يضاف الفطر و البازلاء و نستمر بتقلية الخضار حتى تطرى , يضاف الدجاج المفتت و يقلب لدقيقة ثم تضاف بهارات الكاري مع نصف كوب ماء و يحرك الجميع و تترك على نار خفيفة حتى تنضج الخضار و تتشرب نكهة البهارات و يتبخر الماء .
4. يضاف مرق الدجاج فوق الخضار ( كمية المرق حسب نوع الرز إذا كان المرق قليل عوضي النقص بالماء ) , أضيفي السمن , اتركيه يغلي و تذوقي المرق و ركزي الملح , يمكنك إضافة المزيد من بهار الكاري حسب الذوق .
5. في هذه الأثناء أغسلي الرز عدة مرات و صفيه ثم أضيفيه للمرق المغلي , اتركيه يغلي مجدداً لدقيقة , غطي القدر و اطبخيه على نار خفيفة حتى ينضج , قدميه مع المخلالات أو العيران أو السلطة .

ملاحظات :

1. يمكن استبدال الدجاج باللحم المفروم و يضاف إلى القدر بعد تقلية البصل و يقلب حتى ينظج .
2. عند طبخ الأرز حركيه بالشوكة و ليس بالملعقة حتى لا تتكسر حباته .

[facebook] [tweet] [pinterest] [follow id=”biscotart” ]