كبة بالسياخ بلحم الدجاج

كبة بالسياخ أو كبة عالسيخ الحلبية وصفة كان لازم أنشرها من فترة لولا البرد و السبات الشتوي يلي أنا فيو 🙂

مع دخول كانون الأول ما بقى في مهرب من البرد ,  و كل يوم عن يوم عم يزيد و درجات الحرارة بنزول , مرات مطر و مرات صقيع , الله يبعت الخير , بالبرد بحس حالي مالي مروة كتير على الشغل , حتى الوصفات , بتكون الوصفة جاهزة بس ما بقدر طالع إيدي من جيوبي لأنشرها :

الكبة بالسياخ من وصفات المطبخ الحلبي اللذيذة جداً و في ناس بتسميها كبة قصابية لأنو ممكن نشتريها جاهزة من القصاب .

القصاب بالعادة بيستعمل لحمة الكبابة فقط مع البرغل بس بالبيت عادةً الستات بيستعملو كبابة مع هبرة و برغل و شوية شحمة , فكرت بالظروف الاقتصادية يلي عم نعيشها إني أعمل كبة بالسياخ اقتصادية باستعمال لحم الدجاج و بنفس الوقت استعملت البرغل السمسمي لحتى ما احتاج استعمل ماكينة الكبة يعني حتى تصير خفيفة و نضيفة .

الكبة بالسياخ عادةً تشوى على الفحم بس أنا عملتها بالفرن و طبعاً أنت اختاري ما يناسبك .

بالوصفة رح تشوفو إني استعملت زيت الزيتون بالأصل لازم أستعمل دهنة ( دهنة خروف ) لكن ما كانت متوفرة عندي و فكرت جرب زيت الزيتون طلعت رووووعة .

ممكن تستخدمو هالكبة لعمل كبة بالسياخ مطجنة الوصفة هنا

مقادير الكبة القصابية :

1 كغ هبرة دجاج

½ كغ برغل سمسمي

1 حبة بصل

½ 1 ملعقة صغيرة بهار مشكل ( بهار حلبي )

1 ملعقة صغيرة قرفة مطحونة

½ ملعقة صغيرة كمون مطحون

½ ملعقة صغيرة زنجبيل مطحون ( اختياري )

1 ملعقة كبيرة نعناع يابس

2 ملعقة كبيرة فليفلة مطحونة ( بابريكا ) كمية الفليفلة حسب رغبتك

10 ملعقة كبيرة زيت زيتون ( الأفضل استخدام 100 غ دهنة خروف )

طريقة عمل الكبة القصابية الحلبية :

1. يغسل البرغل بسرعة و يصفى بواسطة مصفاة سلك ناعمة مع الضغط عليه للتخلص من الماء ثم يوضع في وعاء كبير .
2. تقشر البصلة و تبشر فوق البرغل , تضاف البهارات و تخلط جيداً مع البرغل و البصل .
3. تضاف هبرة الدجاج و الزيت ( أو الدهنة في حال استعمالها ) و تدعك جيداً مع خليط البرغل ( في حال وجود ألياف في هبرة الدجاج أزيليها ) .
4. خذي قطعة صغيرة من عجينة الكبة بحجم الجوزة و كوريها بين يديك ( إذا كانت العجينة تلتصق بيديك ادهني قليل من الزيت على راحة اليدين ) , ضميها بسيخ خاص بالشوي , إذا كنت تريدين شويها على الفحم , أما إذا كنت تريدين شويها بالفرن , ضميها بالسيخ ثم انزعيها و ضعيها على صينية مدهونة جيداً بالزيت النباتي أو السمنة .
5. في حال شويها بالفرن يحمى على درجة 180 مئوية لمدة 10 دقائق حتى ربع ساعة و يثبت الرف السفلي .
6. توضع الكبة في الفرن لمدة 25 حتى 30 دقيقة أو حتى تنضج مع هز الصينية عدة مرات للتحمر الكبة من كل الجهات .

إضافة :

يمكنك شوي الكبة بالفرن و من ثم تدخينها لإعطائها نكهة الشواء على الفحم .

أثناء شوي الكبة بالفرن  احضري قطعتين من الفحم ثم ضعيهم على نار البوتغاز حتى تصبح جمر .

أخرجي الكبة من الفرن بعد أن تكون قد نضجت و ضعي صحن معدني في وسط الصينية .

ضعي الجمر داخلها ثم اسكبي عليه ملعقتين من زيت النباتي و غطي الصينية مباشرة بورق الألمونيوم و اتركيها 10 دقائق لتتدخن .