البندورة المجففة من الوصفات المشتركة بين أغلب البلدان و كل بلد إلو وصفاتو الخاصة لآستعمالها , في بلدان بستخدموها بالشوربة أو البيتزا و في بلدان بالسلطات و في بلدان بالطبخ , و نحن بسوريا أكتر شيم نستخدمها مع الكبة النية ( الوصفة هنا ) و الإيج ( الوصفة هنا ) .
زمان كنت جفف البندورة بالطريقة التقليدية بإني أقسم كل حبة نصفين و أتخلص من البذور و غمرها بكمية وافرة من الملح و أنشرها على صواني تحت أشعة الشمس القوية لحتى تنشف تماماً و احتفظ فيها بالبراد بكيس محكم الإغلاق و عند الاستعمال بنقعها بالماء و بغير الماء عدة مرات لحتى تطرى و تتخلص من الملوحة , كانت تطلع طيبة جداً لكن اللون غامق و كنت دوماً شوف بالنت صور الطماطم المجففة بلون فاتح و جميل و مشهي , ففكرت يمكن من الملح الزائد و جربت بكمية ملح أقل و النتيجة نفسها , بندورة طيبة بس غامقة .
ضل الموضوع عم يشغلني و أصريت إني لازم أبحث لأوصل للنتيجة يلي بترضيني و بديت عملية البحث .
بتعرفي الشعور لما تكوني عم تفتلي بالسوق على شنطة أو بلوزة بلون معين و ما تلاقي طلبك و ترجعي على البيت رجليكي منفخين من ألم اللف بالسوق , و ترجعي تقرري إنك بكرا رح تنزلي لغير سوق , نفس الشعور كان عندي بس على محركات البحث لحد ما وصلت للسر 🙂
و الصراحة هالسر هو معلومة علمية , لما عرفتها تأكدت إني على صواب لما بقول للناس ( الطبخ ثقافة و علم ) , السر هو إنو نسلق البندورة لمدة قصيرة من 1 – 2 دقيقة و نرفعها على ماء بارد , رح تسألوني ليش نسلقها ؟ السلق بيثبط نشاط الأنزيمات الموجودة في البندورة و بالتالي بتتوقف عملية الأكسدة و منحصل على بندورة مجففة بلون جميل و بيساعد على حفظها بعد التجفيف .
طبعاً اللون ما بيكون أحمر متل البندورة الفريش لكن ما بيكون مائل للسواد متل لما نجففها بدون سلق , يعني رح نحصل على لون أحمر متوسط و هي صورة بندوراتي الحلوين أكبر دليل على ذلك .
حابة بس قلك إنو لما تشتري البندورة اختاري البندورة الحمراء الناضجة ( ناضجة لكن متماسكة و مو مهترية ) , و يكون فيها اللب أكثر من البذور و تكون متوسطة الحجم , السنة موسم البندورة كلو حبات كبيرة عملاقة و بصعوبة لحتى حسنت نقي 2 كيلو بهالموصفات .
المقادير :
بندورة ( طماطم ) الكمية حسب الرغبة
ملح
فلفل أو أوريغانو أو أي أعشاب منكهة ( إختياري )
الطريقة :
- اغسلي البندورة و املئي قدر بكمية من الماء تكفي لغمر البندورة و ارفعيه على النار حتى يغلي , عند الغليان أضيفي حبات البندورة , غطي القدر و اتركيها لمدة دقيقة و نصف , اطفئي النار و ارفعي حبات البندورة إلى وعاء مملوء بالماء البارد لإيقاف عملية الطهي .
- قشري البندورة (هذه خطوة اختيارية لكن أنا قشرتها لأن القشرة انفصلت بسبب السلق) اقسميها بالنصف طولياً , استخرجي البذور .
- رشي البندورة بالملح ( كمية الملح كما ترغبين بأن تكون ملوحتها عند التقديم ) يمكن تتبيلها بالفلفل أو الأوريغانو أو أية أعشاب تفضلينها , ضعيها في مصفاة و اتركيها 15 دقيقة للتخلص من أي سوائل فيها .
- رتبيها على صينية ستانلس ( لا تستخدمي الألمنيوم ) و ضعيها تحت أشعة الشمس القوية يمكن أن تغطيها بقطعة شاش رقيق لتحميها من الغبار و الحشرات ( أنا ما غطيتها الصراحة ) , قلبيها في اليوم التالي حيث تحتاج من يومين حتى ثلاثة أيام حسب قوة الشمس و حسب سماكة حبة الطماطم .
- حفظ البندور المجففة : بعد أن تجف تماماً و لا يبقى فيها أي رطوبة تعبئ في كيس و يحكم إغلاقه و تحفظ في الفريزر .
ملاحظات :
- يمكن تجفيف البندورة بالفرن , شغلي الفرن على درجة 60 مئوية و ضعي صينية الطماطم بالفرن لمدة 18 حتى 24 ساعة ( قد يختلف التوقيت حسب نوع الفرن ) قلبيها أثناء ذلك عدة مرات مع تدوير الصواني .
- عند تجفيفها تحت أشعة الشمس إذا كان الجو ليلاً رطب أدخلي الصينية إلى داخل المنزل و في الصباح أعيديها تحت أشعة الشمس .
- يمكن تجفيف البندورة حتى تصبح بقوام الزبيب المجفف أو المشمش المجفف ثم تعبئ في مرطبانات و تغمر بزيت الزيتون و بهذا تكون جاهزة للتقديم عند رفعها من الزيت مباشرة .
- عند الاستعمال أغمري البندورة بماء ساخن حتى تطرى و استعمليها حسب الوصفة .
إذا أعجبتك هذه الوصفة و رغبت في مشاركتها مع عائلتك و اصدقائك لطفاً اضغط على أحد أزرار التواصل الاجتماعي في الأسفل
[facebook] [tweet] [Google] [pinterest] [follow id=”biscotart” ]
