الكليجة السورية

الكليجة من الوصفات يلي منتشارك فيها مع الأخوة العراقيين لكن كل بلد بيحضرها بطريقتو الخاصة , الكليجة العراقية بتتميز بالهال و حشوتها ممكن تكون إما تمر أو عجمية و العجمية هي عبارة عن خليط من جوز و سمسم و عسل و سمن و مممكن مستكة أما الكليجة السورية فهي بتتميز بالبهارات تقريباً جميع البهارات المستخدمة في الحلويات موجودة فيها و لهيك لونها بيكون غامق أكتر من الكليجة العراقية خاصة مع كمية القرفة المستخدمة فيها و هالبهارات رح تعطر مطبخك لمى تجربيها ,  أخر مرة عملتها كان أول المسا , ريحة البهارات ضلت فايحة بالبيت لأخر السهرة , بالنسبة للسوريين منعملها إما سادة متل ما بتحبها الوالدة أو بالتمر متل ما بحبها أنا .

هالمرة لما عملتها ما كان في كهربا لذلك أطريت أخبزها على فرن الغاز و طبعاً معلومكن الشواية بتكون على الكهربا , شلون بدك تدبري راسك يا سوسو خانم ؟…… شلون ؟…….. شلون ؟… بسيطة لقيتها صرت لما تستوي من تحت اقلبها على الطرف التاني و أنطر لحتى تستوي بس ما تركتها و هي بالفرن و لا دقيقة بتعرفو ليش لأنو الكليجة غدارة , قصدي لونها غامق و هالشي ما بيخليكي تعرفي إيمتى استويت لأنو الكليجة للناس يلي مو دايقينها بحياتن مو متل البسكويت مقرمشة أطرى شوي, من برا مقرمشة و من جوا أطرى شي بسيط يعني بحسن قلك إنو عملتها كذا مرة لحتى صار عندي خبرة فيها , أول مرة تعلمتها من ست قالتلي هي الكليجة على طريقة أهل القامشلي جيت أخبزها و ما كان لسى عندي خبرة فيها كل ما تطلع صينية من الفرن دوق كم قطعة صرت متل النكتة , كان في واحد حلبي بالطيارة جابتلو المضيفة صحن فيو كوساية و 3 يبرقات بعد ما أكلن قلها مستويين هاتي الطنجرة هههههه يعني أكل ربع الصينية لحتى أعرف استوت و لا لسى , إذا عيلتك صغيرة متلي فيكي تعملي نص المقدار و حتى ما تتعبي عملي نصو و زبطي ع الأخر و حطي الصواني بالبراد و تاني يوم اخبزيه هيك أسهلك .

المقادير :

2 كغ طحين أبيض

1 كغ طحين فرخة

1 كغ سمنة

½ 2 كوب زيت نباتي ( أو خليط من زيت نباتي و زيت زيتون )

1 كغ سكر ناعم الحبيبات

3 كوب حليب

2 ملعقة كبيرة خميرة

التتبيلة :

4 ملعقة كبيرة حبة بركة

4 ملعقة كبيرة سمسم

4 ملعقة كبيرة قرفة مطحونة

2 ملعقة صغيرة جوزة الطيب

2 ملعقة صغيرة قرنفل مطحون

2 ملعقة صغيرة محلب مطحون

2 ملعقة صغيرة شمرة مطحون

2 ملعقة صغيرة يانسون مطحون

2 ملعقة صغيرة ملح

للتلميع : بيضة مخفوقة مع رشة فانيليا

الطريقة :

1. ينخل نوعي الطحين مع التتبيلة في وعاء عميق , تسخن السمنة على النار حتى تذوب ثم تضاف فوق الطحين مع كمية الزيت و يحرك الجميع حتى يتشرب الطحين المواد الدسمة بشكل جيد ( سيكون لون المزيج غامق بسبب البهارات ) تترك ترتاح لمدة ساعة .
2. بعد ساعة تذوب الخميرة في الحليب نصف كوب من الحليب الدافئ مع ملعقة صغيرة من السكر , تغطى و تترك حتى تفاعل الخميرة و تظهر الرغاوي على سطح الحليب .
3. في هذه الأثناء يضاف السكر لمزيج الطحين و يخلط الجميع باليد حتى يتوزع السكر جيداً , يضاف مزيج الخميرة مع باقي الحليب و نعجن حتى نحصل على عجينة ناعمة ( لا داعي لعجن العجينة لفترة طويلة مثل الفطائر و الخبز يكفي أن نعجن حتى تتشرب الحليب و تتجانس ) تغطى و تترك لمدة ساعتين .
4. بعد هذه المدة يحمى الفرن على درجة 180 مئوية .
5. تؤخذ قطعة من العجين و ترق بين طبقتي نايلون بسماكة ½ سم , ترفع ورقة النايلون و تقطع حسب الرغبة و تصف في الصينية و تثقب بواسطة شوكة عدة مرات ( هذه الخطوة ليست للتزين و إنما ستساعد على وصول الحرارة إلى داخل العجينة كي تنضج ) ,ثم تدهن بالبيض .

1. تخبز على الرف السفلي مع تشغيل الشواية لمدة 150-20 دقيقة و يجب مراقببتها جيداً حتى لا تحمر زيادة عن اللزوم , عندها أطفئي الشواية و اكملي خبزها .

ملاحظات :

1. لحشو الكليجة بالتمر , يعجن التمر مع القليل من السمنة و يبرم على شكل حبل بين طبقتي نايلون ثم يضغط عليه حتى يصبح مسطح الشكل و يترك جانباً , ترق العجينة بين طبقتي نايلون على شكل مستطيل و لكن بسماكة أقل من ½ سم , يوضع التمر على طرف العجينة و تقلب باقي العجينة فوقها و تغلق الأطراف جيداً بالاستعانة بالنايلون , تقطع بالسكين حسب الرغبة و تصف بالصينية و تثقب بالشوكة ثم تدهن بالبيض و تخبز .
2. إذا كان لديك رفين للفرن يمكن وضع صينيتين معاً و بدلي بينهما في منتصف مرحلة الخبز .
3. إذا كان فرنك من النوع الحامي جداً اخبزيها من الأسفل ثم شغلي الشواية حتى يصبح لونها ذهبي من الأعلى .