في كتير ناس متلي بتميل للبيض المقلي أكتر من البيض المسلوق , هدول الناس بس يجربو هالوصفة رح يوقعو بغرامها لأنها راااائعة بالطعم و الشكل و إذا عاملة بوفيه رح تلفت نظر ضيوفك كطبق مقبلات غني و أنيق و حتى الأولاد الصغار رح يحبوها .
هالنوع من المقبلات مشهور كتير بأوربا و إسمو ( Deviled Eggs ) المكون الأساسي بهالطبق هو البيض المسلوق و المتبل بمنكهات مختلفة و كل بلد بيضيف منكهات بتختلف عن البلد التاني , بروسيا بيتزين بالكافيار بينما بالسويد ممكن يخلطو الصفار مع السور كريم أو كريمة الطبخ و يزينو بعشبة الشبت و في بلدان بتزينو بالمخلل .
و بسبب تنوع طرق تحضير هالطبق اخترتلكن طريقة سهلة و بسيطة وما بتاخد منك وقت أو جهد و بنفس الوقت طيبة .
المقادير :
5 بيضة مسلوقة ( يجب أن يكون صفار البيض متماسك بعد السلق و ليس برشت )
2 ملعقة كبيرة مايونيز
1 ملعقة كبيرة عصير ليمون
1 ملعقة صغيرة صلصة الخردل ( مستردة )
ملح و فلفل أسود حسب الرغبة
للتزيين :
زيتون أسود
بقدونس
الطريقة :
- يقشر البيض و تقسم كل حبة طولياً , ينزع صفار البيض بلطف و يوضع في وعاء .
- يخلط صفار البيض مع بقية المكونات و يعاد حشو بياض البيض المسلوق و يزين بالبقدونس و الزيتون الأسود .
ملاحظة : يمكن زيادة كمية المايونيز و صلصة الخردل حسب الذوق .
يسلم ايديكي سهى وصفاتك لاغنى عنها سواء الأكلات التراثية او الأكلات العصرية . من نجاح الى نجاح انشالله بالتوفيق . وطبق البيض هاد للصغار وكبار السن روووووعة ولكل الإعمار رائع
الله يسلمك نتولة رأيك شهادة أعتز فيها
إنشاء تجرربي هي الوصفة و تحبيها أنت و العائلة 🙂
يسلمو كتير شكلها بشهي مع انني مو صحبة مع البيض المسلوق منشان زنختو ولو اكلت بيضة كل سنة بمليها فليفلة وكمون حتى ماحس بطعمتها هههه
الله يسلمك نور الشمس , يا ستي هي الوصفة خص نص للناس يلي ما بتحب البيض المسلوق أولا ما بتحسي بزنختو لأنو الخردل و البهارات بيقتلوها تمام
و تاني شي نكهتو مميزة و مختلفة عن البيض المسلوق العادي و إذا زينتي كمان بالمخلل مع الزيتون الأسود ما أحكيلك غرااااام