من فترة كنت بزيارة لجارتي الدكتورة أنس جوبي و من ضمن الضيافة المميزة يلي قدمتها الخوخ المجفف و هي بتعرفني بحب هالشغلات كتير متل التين المجفف و المشمش المجفف و قالتلي إذا عجبك رح أعطيك الوصفة .
بمجرد إني اتذوقت أول قطعة يممي الطعم رائع جداً و مشهي و مباشرة خطر ببالي إني شارك هالوصفة المميزة معكم .
بعد كم يوم من زيارتي اشتريت الخوخ و باشرت بتحضير وصفة الخوخ المجفف و إن شاء الله رح حاول أنزل وصفات باستخدام الفواكه المجففة .
الحلو بهالوصفة إنو من مكونات بسيطة و قليلة رح تعملي شي مميز و نافع و مغذي و بضل لأيام الشتوية و البرد و على فكرة ممكن تستخدمو بكتير وصفات مثل مهلبية بالفواكة
و ممكن تاكلو مع مكسرات كسناك لذيذ و مغذي .
و حبيت إني صور الوصفة فيديو لحتى تشوفوا التفاصيل مشاهدة ممتعة أعزائي .
المقادير :
1 كغ خوخ
ربع كيلو سكر
كوب ماء
ملح الليمون حسب الحاجة
الطريقة :
- اختاري حبات الخوخ المتماسكة , اغسليها و اتركيها في المصفاة حتى تجف .
- انزعي بذور الخوخ و ضعيه في قدر ثم رشي عليه السكر و قلبيه حتى تغطى كل حبات الخوخ بالسكر .
- اتركيه في البراد من المساء حتى الصباح .
- في اليوم التالي اضيفي للخوخ كوب من الماء و ارفعيه على النار , قلبي بهدو حتى يذوب السكر و يغلي المزيج .
- عندما يغلي الماء ارفعي حبات الخوخ جانباً ثم أضيفي ربع ملعقة صغيرة ملح الليمون حركي المزيج و تذوقيه يجب أن يكون طعمه يحتوي على مزة حموضة خفيفة و إلا أضيفي المزيد من ملح الليمون .
- اتركي القطر ليعقد حوالي 8 حتى 10 دقائق .
- اعيدي كمية من حبات الخوخ بحيث تغطي قاع القدر اتركيها دقيقة أو دقيقة و نصف مع تقليبها ثم صفيها من القطر و ارفعيها على صينية .
- كرري العملية حتى تنتهي كل كمية الخوخ .
- ضعي قطعة قماش رقيق على صينية الخوخ و ثبتيها بمشابك و اتركيها عدة أيام تحت الشمس مع التقليب كل يوم .
- عندما يجف الخوخ احفظيه في الفريزر مع القطر .
ملاحظة :
لا تقومي بتجفيف الخوخ كثيرا حتى لا يصبح كقطعة جلد يجب أن يبقى فيه رطوبة خفيفة .
