شجرة الزيتون من أقدم الأشجار المتعارف عليها في الحضارة الإنسانية ، و هي الشجرة المباركة التي ذكرها الله عز وجل في كتابه الكريم في قوله تعالى : بسم الله الرحمن الرحيم ( و التين و الزيتون ، و طور سنين ) ، و غصن الزيتون هو رمز السلام ، فما أجملها و ما أعظم المعاني التي تحملها هذه الشجرة العميقة الضاربة في الأعماق .
أجدادنا زمان كان يزرعو أرضن بالزيتون لأنو بركة و يستفيدو من ثمار هالشجرة بالزيت أو بالأكل , أحياناً لما بكون ماشية بالشارع و بمر جنب حديقة شي بيت و أغصان شجرة الزيتون عم بطل من فوق السور بغرف قلبي عليها و بغبط أصحاب هالمنزل على النعمة الكبيرة يلي عندن , بحس هالأغصان متقصدة تطلع فوق السور لحتى تسلم على الناس يلي مارة بالشارع و تاخدن و لو لثواني من حياة المدينة الإسمنتية .
تجهيز الزيتون المكسر أبداً مو صعب لأنو الفكرة بطريقة تحضيرو كتييير سهلة مجرد إنك رح تحطي بمرطبانات و تكبسي بمحلول ملحي عالي التركيز ممكن هالعملية تاخد وقت حسب كمية مونة الزيتون يلي رح تعمليها , و بمجرد ما تخلصي رح تنسي لمدة 40 يوم على الأقل و ممكن يبقى معك محفوظ بالملح طول السنة و ما بيصرلو شي و لا بيفسد .
ممكن تكسري الزيتون بالبيت بواسطة حجرة المحشي مثلاً أو تقلبي الهون رأساً على عقب و تكسري بإيد الهون بدون ما تكسري البذرة , و تجارياً يتم تكسير الزيتون بآلات خاصة (دون تكسير البذرة) و هالعملية بتساعد على سرعة التخلص من المادة المرة عند غمرها بالمحلول الملحي .
و أنصحك إنك تشتري الزيتون مكسر و لا تتعبي حالك بتكسيرو بالبيت , يعني مافي داعي يصرلك عضلات و لا تلعبي كمال أجسام بإيد الهون 😀 و خاصة إنو ممكن يسود لحتى تكوني خلصتي كل الكمية إلا إذا حطيتي بالماء فبهالحالة استخدمي نفس الماء لإعداد المحلول الملحي .
عادة الزيتون المكسر بيتقدم بعد تتبيله بالمنكهات و المطيبات و سأقدم لك تتبيلتي الخاصة إنشاء الله بعد أن تصبح هذه الكنوز جاهزة للأكل .
المقادير :
زيتون أخضر
ملح خاص بالمونة
ماء حسب الحاجة
الطريقة :
- يعبئ الزيتون في مرطبانات بعد إزالة الأوراق إن وجدت أو الأعواد , تملئ المرطبانات بالماء و يفرغ الماء في وعاء كبير لإعداد المحلول الملحي .
- يذوب الملح في هذا الماء حتى نحصل على التركيز المناسب و المسمى بالعامية ( عيار بيضة ) أي نضع بيضة نظيفة في المحلول الملحي فإذا طفت إلى الأعلى و ظهر جزء منها على سطح الماء هذا يعني أن تركيز الملح مناسب .
- يعاد ملئ المرطبانات بالمحلول الملحي, توضع قطعة من النايلون في فوهة المرطبان بحيث يغمرها الماء حتى لا تطفو حبات الزيتون إلى الأعلى , تغلق المرطبانات جيداً و تترك على الأقل 40 يوم قبل الانتقال إلى مرحلة تحلية الزيتون .
- مرحلة التحلية : بعد مرور 40 يوم يمكنك استهلاك الزيتون و لكن لابد من التخلص من الملح الكثير الذي تشربته حبات الزيتون , تخلصي من الماء الماح , اغمري الزيتون بماء عادي من الحنفية و بدليه عدة مرات في اليوم و لعدة أيام حتى يتخلص من الملح الزائد ثم يقدم .
ملاحظات :
- لا يغسل الزيتون قبل حفظه بالمحلول الملحي حتى لا نخسر الزيت الموجود في حباته .
- يستغرق الزيتون 40 يوم في المحلول الملحي ليتخلص من مراره و يمكن أن يبقى في هذا المحلول طيلة العام دون أو يفسد .
- عند تحلية الزيتون لا تقومي بتحلية كامل كمية المونة , و إنما قومي بتحلية كمية تناسب استهلاك عائلتك و قبل نفاذ هذه الكمية ابدئي بتحلية كمية أخرى .
- لا تشتري الزيتون قبل موسم الأمطار لأنه يكون مر جداً و يتأخر بالتحلية .
- بعد 40 يوم لن يبقى لون الزيتون أخضر كما في الصورة و إنما سيتحول اللون إلى الأخضر المصفر و هذا طبيعي .
- فكرة تعلمتها من صديقتي بعد مرور فصل الشتاء تقوم بتغير الماء الملحي بماء ملحي جديد و تحفظ ماتبقى من المونة في البراد .
يمكنك مشاهدة طريقة تكليس الزيتون هنا
شاركها على بينترست [pinterest]
تابعنا على تويتر [follow id=”biscotart” size=”large” ]
يسلموا ايديكي ع ه الابداع روعة بصدق ملاحظاتك قيمة ولمستك الفنية مميزة جدا” . والزيتون المكلس كان حلمي اعرفه وعرفت طريقته منك الموسم الجاي انشا الله بعملو الف شكر
الله يسلمك يا رب
تشكري على هالكلمات المشجعة حبيبتي و إن شاء الله الموسم الجاي تعملي و أكيد رح يطلع طيب و رائع من تحت دياتك