كبة نية بالزيت ( كبة نية بدون هبرة )

الكبة النية من الوصفات التراثية و الرمضانية بامتياز يعني نادراً ما تخلو مائدة رمضان من الكبة النية بالزيت أو الكبة النية بالهبرة .

سبحان الله سفرة رمضان بتكون غنية كتير بأطباق المقبلات و السفرة بتكون مثل لوحة فنية غية بالألوان

و أكيد هالرسام المبدع يلي رسمها هي الأم ست البيت ( الله يحفظ كل الأمهات )

زمان كنت أنا و ماما نعمل الكبة النية بالزيت بالطريقة التقليدية يعني بصل طازج بينطحن مع عجينة الكبة و ع الوش تقلاية البصل

لكن مرة من المرات خطرتلنا فكرة إنو نضيف تقلاية البصل مع زيت الزيتون بقلب عجينة الكبة و نطحنهن سوا …. طلعت غرااااام , النكهة مو معقولة شو طيبة و من وقتها هي طريقة عمل الكبة النية المفضلة عند عائلتي .

و مشان خفف الشغل برمضان بعمل كمية برغل ( كيلو ) طبعاً هي كمية كبيرة لعيلتي

بجهزها و بقسمها حصص حسب احتياجنا و بحطها بكياس نايلون و بخزنها بالفريز و كل يوم برمضان بطالع كيس بتركو ليروح منوا لتلج و بدعكو و بعملو تقلاية بصلة صغيرة بس للزينة .

المقادير :

مقادير التقلاية :

4 – 5 بصلات كبيرة مفرومة

1 كوب زيت زيتون

مقادير الكبة :

1 كغ برغل عمقي خاص بالكبة

2 بندورة حجم وسط مقطعة أرباع أو 4 – 5 أقراص بندورة مجففة

1 ملعقة كبيرة دبس بندورة ( شغل البيت لأن فيها طعم حموضة )

1 ملعقة صغيرة كمون

5 قرن فليفلة مجففة ( صغيرة الحجم )

2 بصلة متوسطة الحجم مقطعة أرباع

ملح حسب الرغبة

للتزيين : بصل مفروم مقلى بالزيت حتى يصبح ذهبي

الطريقة :

1. تحضير التقلاية : يوضع زيت الزيتون في قدر و يسخن , ثم يضاف البصل المفروم و يحرك ثم تخفف النار و يترك حتى يصبح ذهبي اللون مع التحريك بين الحين و الآخر ( انتبهي حتى لا يحترق ) , ثم اتركيه جانباً .
2. يغسل البرغل جيداً و يصفى ( بدون مصفاة ) و يترك يرتاح من 10 حتى 15 دقيقة , في هذه الأثناء تغسل الفليفلة المجففة و تنقع حتى تطرى ثم تصفى ( نتبع نفس الخطوات بالنسبة للبندورة المجففة في حال استعمالها مع تغير الماء عنها عدة مرات لأنها تكون مالحة جداً ) .
3. تضاف الفليفلة و البندورة الطازجة أو المجففة و دبس البندورة و الكمون و الملح و البصل الطازج المقطع أرباع و البصل المقلي مع الزيت فوق البرغل و يحرك جيداً و يدار بماكينة الكبة مرتان أو ثلاث حسب نوع البرغل .
4. تقسم العجينة أقسام حسب استهلاك كل عائلة ثم يعبئ كل قسم بكيس نايلون و يمسد و تحفظ في الفريزر لحين الاستخدام .
5. عند الاستخدام يخرج كيس ثم يترك حتى يفك عنها الثلج ثم تدعك جيداً , يمكن إضافة قليل من الماء أثناء الدعك و تمد في طبق التقديم و تزين بالبصل المفروم المقلى بالزيت (كما في الخطوة 1 ) مع القليل من زيت زيتون على الوجه.

ملاحظة : يمكن استخدام نفس الوصفة لعمل الإيج مع إضافة بقية مكونات الإيج , وصفة الإيج موجودة ( هنا ).