بيتزا على المقلاية

أحياناً من نكون مشتهيين على البيتزا و منقرر نعملها بس فجأة منتراجع عن هالقرار إما لأنو منتكاسل من العجينة و بدها وقت لتختمر أو بدنا نحضر الصوص و رح ياخد معنا وقت , لذلك فكرت إنو هالوصفة رح تقلب موازين البيتزا رأساً على عقب لأنو بالدرجة الأولى تحضيرها ما بياخد وقت و سريعة جداً يعني أسرع من الديلفري , و ثانياً إقتصادية لأنو رح نعملها على الغاز بدون فرن يعني بالمختصر وصفة سوبر سهلة , سوبر إقتصادية , بالنسبة إلي لن أتخلى عنها أبداً أبدأ.

المقادير :

للعجينة :

1 بيضة

4 ملعقة كبيرة لبن زبادي

3 ملعقة كبيرة زيت نباتي

1 ملعقة صغيرة بيكنغ باودر

1ملعقة صغيرة ملح ( أنا استعمل أقل من ملعقة )

1كوب زائد 2 ملعقة كبيرة  طحين

للصوص :

1ملعقة كبيرة دبس البندورة

2 ملعقة كبيرة كاتشب

1 ملعقة كبيرة زيت نباتي

¼ ملعقة صغيرة ثوم بودرة

1 ملعقة صغيرة  أوريجانو

للوجه :

جبنة شيدر أو موزريلا

شرائح بندورة رفيعة جداً

بصل مقطع شرائح رفيعة

شرائح فليفلة رفيعة جداً

فطر

سجق

ذرة مصري

زيتون أخضر أو أسود

الطريقة :

1. في وعاء عميق نخفق البيضة مع اللبن الزبادي و الزيتو الملح و البيكنغ باودر ثم ينخل الطحين فوق المزيج السابق و نعجن حتى نحصل على عجينة طرية و ناعمة ( العجينة ستلتصق باليد لا تضيفي المزيد من الطحين ).
2. تدهن مقلاة غير لاصقة ( تيفال ) بطبقة خفيفة من الزيت و ترق العجينة فوق الطواية باليد , مع الانتباه ألا تكون أطراف العجينة أعلى من الوسط .
3. تمزج مقادير الصوص مع بعضها و تمد فوق العجينة .
4. توزع نصف كمية الجبنة فوق الصوص ثم تصف باقي المكونات حسب الرغبة ( سجق, فطر , ذرة …….. إلخ ) مع الأخذ بعين الاعتبار أن الجبنة و البندورة و البصل و الفليفلة من المكونات الأساسية ,ثم يوزع النصف الثاني من الجبنة .
5. تغطى المقلاة بغطاء طنجرة أو ورقة ألمنيوم و ترفع على نار خفيفة جداً جداً و تترك لمدة 13 -15 دقيقة , ثم تقدم .