إذا كنتو من عشاق كيك الشوكولا الغامق الغني بالنكهة فوصفة مافن الشوكولا بدون بيض أكيد رح تنال إعجابكم خاصة إنو مكوناتها قليلة و متوفرة بكل بيت و كمان بدون بيض .
مؤخراً أجاني كتير من التعليقات على قناة اليوتيوب عم تسألني ليش ما عم نزل فديوهات و البعض معتقد للأسف إني قفلت القناة …. أول أمر أنا ما قفلت القناة و لا عندي نية لذلك أبداً أبداً , القناة رح تضل موجودة ليستفيد منها أكبر عدد من الناس , كل الفكرة إني بالفترة الماضية كنت مشغولة بكورسات الحلويات .
كورسات الحلويات بتاخد مني وقت كبير و مجهود و متابعة للطلاب و رد على استفسارتهم و متابعة تطبيقاتهم و هالشي أكيد رح يخليني قصر شوي بتصوير فديوهات لقناة اليوتيوب .
حبيت أرجع للقناة و صورلكن فيديو تحضير وصفة مافن الشوكولا بدون بيض أتمنى تجربوها و تستمتعوا فيها
المقادير :
3 كوب طحين
½ كوب كاكاو غامق خالي من السكر
2 كوب سكر
2 ملعقة صغيرة بيكربونات الصوديوم
رشة ملح
2 كوب ماء ساخن
ثلث كوب زيت نباتي
2 ملعقة كبيرة خل
ظرف فانيليا
الطريقة :
1. نجهز صينيتي كب كيك ( كل صينية تتسع ل 12 كوب ورقي ) بوضع الأكواب الورقية فيها .
2. في وعاء كبير ننخل الطحين مع الكاكاو و بيكربونات الصوديوم و الملح و الفانيليا ثم يضاف السكر و يقلب الجميع بالمضرب اليدوي حتى تتجانس المكونات .
3. في وعاء آخر نضع الماء الساخن مع الزيت و الخل ثم نحرك جيداً .
4. تضاف المواد السائلة فوق الجافة ثم نقلب بالمضرب اليدوي ( نقلب فقط حتى تمتزج المكونات ) .
5. يوزع الخليط بالتساوي على الأكواب الورقية .
6. يحمى الفرن على 180 مئوية ثم يخبز المافن على الرف الأوسط لمدة 20 دقيقة , تشغل الشواية في الدقائق الأخيرة .
7. يخرج من الفرن و ترفع حبات المافن على شبك سلك و تترك حتى تبرد ثم تقدم .
