يسعدلي أوقاتكم حبايبي متابعي بيسكوتارت
مع قدوم الخريف ما بعرف ليش بزيد ضغط الشغل و كأنو أنا بالصيف كنت قاعدة و لافة رجل على رجل .
بهالشهر بالذات بيطلع شغل شي بتتوقعي و شي بيفرض نفسو فرض و كلو مطلوب منك و لحقي إذا بتلحقي يا شطورة
المدارس بتبدا و صار لازم ألتزم بالدوام مع الطلاب أيضاً من جهة أخرى لازم رتب و نظف شغلات ضرورية بالبيت استعداداً لفصل الشتاء .
دورات الحلويات لازم تابع مع الطالبات و بنفس الوقت ما لازم أنسى قطعة من قلبي و هو موقع بيسكوتارت
من فترة بعد ما نشرت وصفة مافن الشوكولا بدون بيض طلبت مني إحدى المتابعات وصفة مافن الفانيليا مع حبيبات الشوكولا و وعدتها إني نزل الوصفة و مصورة فيديو.
صحيح اتأخرت قليلاً بسبب ضغط الشغل كبير إلا إني و لله الحمد أوفيت بوعدي .
نجي للوصفة وصفة مافن الفانيليا مع حبيبات الشوكولا من أطيب وصفات المافن يلي ممكن تتذوقوها و الحلو إنها سهلة جداً حتى الأطفال فيهن يعملوها و هي فرصة حلوة لتشاركي اطفالك بنشاط ممتع رح يحبو و يحببهم بالطبخ
فيديو الوصفة بتلاقو على قناة Biscotart على اليوتيوب و بالمناسبة لا تنسوا تشتركو بالقناة و تفعلوا زر الجرس لتوصلكن كل الوصفات الجديدة .
المقادير :
110 غ زبدة مذوبة و مبردة
2 حبة كبيرة بيض
ثلثي كوب حليب
1 باكيت فانيليا
2 كوب طحين ( تعادل 250 غ )
½ 2 ملعقة صغيرة بيكنغ باودر
رشة ملح
ثلثي كوب سكر
نصف كوب حبيبات الشوكولا
الطريقة :
1. يحمى الفرن على 190 مئوية ثم يثبت الرف الأوسط في الفرن , نجهز صينية كب كيك بورق الخاص بالكب كيك .
2. في وعاء كبير نضع السكر ثم ينخل الطحين , البيكنغ باودر و الملح فوقه , نحرك بمضرب يدوي حتى تتجانس المواد .
3. في وعاء أخر نضع الزبدة المذوبة و المبردة ثم نضيف الحليب و البيض و الفانيليا و نقلب بمضرب يدوي حتى تتجانس المواد .
4. نسكب خليط المواد السائلة فوق خليط المواد الجافة ثم نحرك بمضرب يدوي حتى تتجانس المواد فقط , نضيف حبيبات الشوكولا و نحرك حتى تتوزع جيداً .
5. يعبئ الخليط في كيس كريما و يقص طرفه ثم يوزع الخليط بالتساوي على أكواب الكب كيك .
6. تخبز في الفرن لمدة 18 أو 20 دقيقة يمكن تشغيل الشواية في الدقائق الثلاث الأخيرة , اختبريه بعود كبيريت .
7. يخرج من الفرن و تترك الصينية 5 دقائق على الرف الشبكي لتبرد ثم تخرج حبات المافن من الصينية و ترتب على رف شبكي و تترك حتى تبرد تماماً .
