إذا منسأل أي طفل شو أكتر نوع حلو بتحبو يمكن الجواب بيكون ( شوكولا , جيز كيك , مارشميلو ……إلخ ) ما أتوقع في طفل ممكن يكون جوابو مهلبية أو رز بحليب .
هالأكلات الصحية القديمة و التراثية في طريقها للانقراض عند الجيل الجديد رغم إنو المهلبية وصفة مشتركة بين أغلب البلدان العربية و مافي بلد بينسبها لنفسو حتى بتركيا بتلاقوها موجودة و بنفس التسمية .
قديماً جدودنا كانو يحضرو المهلبية باستخدام النشا الرطب , بحلب إسمو ( نشاء أخضر ) طبعاً مو المقصود إنو لونو أخضر لأ هو لونو أبيض لكن كلمة أخضر بحلب منستخدمها أحياناً للتعبير عن الأشياء الطازجة و الفريش متل الجبنة الخضر يلي بيكون موسمها بالربيع لما الأرض كلها بتلبس الأخضر .
مع تطور الحياة صار الكورن فلور متوفر بالأسواق أكتر و تخزينو أسهل لهيك منشوف أغلب الستات بتحضرها باستخدامو , و طبعاً مع الحياة الحديثة صرنا نستخدم المضرب اليديوي ( الشريط ) بتحضير أغلب حلوياتنا الشرقية أو الغربية لكن جدودنا كان يستخدمو المغرفة و أثناء الطبخ كانو يرفعو المغرفة للأعلى و يتركو مزيج المهلبية يتساقط , هالتكنيك إسمو التشريب و الفائدة منو إدخال الهواء للمزيج لحتى يطلع أخف و أطيب , المضرب اليدوي حالياً بيعطينا نفس النتيجة .
للتنويع ممكن تطلعي على وصفة مهلبية بالفواكة مع القطر ( هنا )
المقادير :
2 كغ حليب ( معقم و بارد )
¾ كوب نشاء الذرة ( كورن فلور ) تراعى الطريقة الصحيحة لقياس المقادير
رشة ملح
سكر حسب الرغبة
فانيليا أو ماء الزهر
للتزيين : فستق حلبي مجروش أو جوز الهند
الطريقة :
- يوضع الحليب في قدر , يضاف النشاء و الملح ( الملح يضيف مطة لقوام المهلبية ) , يرفع القدر على النار مع التحريك المستمر بمضرب يدوي حتى يبدأ يتكاثف المزيج , تخفف النار و يترك حوالي 3 – 5 دقائق يغلي مع التحريك حتى ينضج النشاء جيداً , يضاف السكر و الفانيليا ( أو ماء الزهر ) و يحرك جيداً و ترفع القدر عن النار .
- تسكب في صحون التقديم و تترك تبرد تماماً ثم تزين بالفستق الحلبي أو جوز الهند .
ملاحظة : البعض يحب إضافة المستكة العربية إلى المهلبية , لإضافتها يجب دقها بالهاون مع ملعقة من السكر ثم تضاف في آخر مرحلة .
