كعك بالزيت ( كعك العيد )

الغربة حلوة و مو حلوة , حلوة لأنك بتتعرفي على بلاد جديدة و حضارة مختلفة و بتعاشري ناس بعيدين عن ثقافتك و أسلوب تفكيرك هالشي بخليكي مرنة أكتر بالحياة و بيعطيكي قوة و خبرة , بتتعلمي شغلات كتيرة و بتعتمدي ع حالك بكل صغيرة و كبيرة , و بتصير عيلتك هي كل دنيتك.

ومن جهة تانية الغربة مو حلوة لأنك بتصيري بعيدة عن كل شي حلو محفور بذاكرتك , جواتك شوق كبير للأهل و الأصحاب و الحارة , للشارع يلي كنتي تتمشي في مع رفقاتك , للشجر … للعصافير … لكل التفاصيل صغيرها و كبيرها .

هالوصفة كعك بالزيت أو في ناس بتسميها كعك العيد خص نص لعيون الغربتلية , كتير طلبوها مني و هي أنا ع الوعد …. كعك بالزيت ( كعك حلبي مالح ) متل يلي منشتريه من السوق و أطيب كمان , بس تجربي رح تفوح من مطبخك رائحة حلب …… الحلو بهي الوصفة إنو المقدار ممكن ينقسم على اتنين بكل سهولة , أنا دوماً بعمل نصف المقدار لأنو عيلتي صغيرة , هالكعكات الحلوين بيعملو أشهى و أطيب ثنائي مع حبيب قلبي ( الشاي ) , رح أتركك مع المقادير و ألف صحة و هنا.

المقادير :

1 كغ طحين كاتو

½ 1 ملعقة صغيرة ملح

1 ملعقة كبيرة بيكينغ باودر

1 ملعقة صغيرة محلب مطحون

1 ملعقة صغيرة شمرة مطحونة

1 ملقة صغيرة يانسون مطحون

2 ملعقة كبيرة سمسم مطحون

2 ملعقة كبيرة حبة بركة

1 كوب زيت نباتي

1 كوب زيت زيتون

1 كوب ماء ساخن ( ساخن و ليس مغلي )

الطريقة :

1. ينخل الطحين و البيكينغ باودر في وعاء عميق يضاف الملح و بقية التوابل و يحرك الجميع بالمضرب اليدوي .
2. يضاف الزيت النباتي و زيت الزيتون  و يحرك الجميع حتى يتشرب الطحين كل الزيت , يضاف الماء الساخن و يعجن الخليط حتى نحصل على عجينة لينة.
3. تغطى العجينة و تترك ترتاح مدة ساعتين .
4. تؤخذ قطعة من العجينة و يترك الباقي مغطى حتى لا يجف , تقطع إلى قطع صغيرة أو حسب الحجم المرغوب , تبرم كل قطعة إلى حبل صغير , توضع النهايات فوق بعضها لتصبح كعكة صغيرة , ترتب في الصينية , و تكرر العملية حتى ينتهي العجين .
5. يحمى الفرن على درجة 180 مئوية مع تشغيل الشواية و يترك 10 دقائق حتى يحمى ثم تخبز الكعكات على الرف الأوسط حتى يصبح لونها زهري , تخرج الصينية من الفرن و تترك الكعكات تبرد في الصينة .

ملاحظة :

1. بالتسبة للزيت المستخدم أنا استعمل كل المقدار من الزيت النباتي لأن عائلتي لا تفضل نكهة زيت الزيتون في هذا الكعك .
2. هذه الوصفة سهلة جداً لكن السر في خبز الكعكات ,تخبز حتى يصبح لونها زهري , إذا كان فرنك من النوع الحامي اخبزي الكعكات من الأسفل و شغلي الشواية في الدقائق الأخيرة .

 من تطبيقات المتابعين :

تطبيق السيدة Hloli Nahas للوصفة أشكرها لمشاركتنا صورة تطبيقها و ألف صحة و هنا