وصفة صيفية غنية بنكهة البندورة أو كما يسميها البعض طماطم و هي من الأكلات السورية التقليدية .
البرغل بالبندورة على الطريقة الحلبية بيختلف عن البرغل بالبندوة على الطريقة التركية , بحلب يعتبر طبخة نباتية لأنو ما فيها لحمة بس المميز فيها إنو بتنطبخ بالدهنة و البرغل بيكون مخبوص , مالي صحبة مع البرغل المخبوص , بحب البرغل المفلفل لذلك حبيت أعمل شي بين الطريقتين الحلبية و التركية لهيك ضفت الدجاج لحتى زيد النكهة و القيمة الغذائية, و قوام البرغل عملتو مو مفلفل و لا مخبوص يعني حبة البرغل مستوية و أخده راحتها بحيث تستمعي بكل لقمة , و استعملت السمن العربي يعني السمن البلدي و ممكن تستعملي الدهنة إذا بتحبي .
أكتر شي بحبو بهالأكلة البصل الذهبي يلي ع الوش بحسو متل فرفيط الدهب.
المقادير :
350 غ صدور دجاج ( منزوع الجلد ) مقطع مكعبات
1 ملعقة صغيرة بهار مشكل
½ ملعقة صغيرة قرفة
½ ملعقة صغيرة زنجبيل
رشة فلفل أسود
8 ملعقة كبيرة زيت نباتي أو زيت زيتون
2 ملعقة كبيرة سمن عربي ( سمن بلدي )
3 بصلة متوسطة الحجم , مفرومة
3 حبة فليفلة خضراء حجم كبير , مفرومة
4 حبة بندورة كبيرة الحجم و ناضجة ( حوالي 1200 غ )
2 ملعقة كبيرة دبس بندورة ( من العلب )
2 مكعب مرق الدجاج
2 كوب برغل خشن
1 كوب ماء
الطريقة :
- يغسل الدجاج و يوضع في مصفاة و يترك جانباً .
- توضع البندورة في ماء ساخن لمدة 30 ثانية أو حتى تنفصل عنها القشرة , تنقل إلى ماء بارد , تقشر , و يستخرج البذر فوق مصفاة ناعمة , اجمعي الماء المتساقط من البندورة و احتفظي به لطبخ البرغل , افرمي البندورة و اتركيها جانباً .
- في قدر عميق يسخن 3 ملعقة كبيرة زيت مع ملعقة سمن ثم تضاف بصلة واحدة مفرومة و يقلى حتى يصبح أشقر, ترفع البصلة مع الزيت في وعاء صغير و تترك جانباً .
- يسخن باقي الزيت و السمن في نفس القدر , يضاف باقي البصل المفروم و يقلى مع رشة ملح حتى ينضج, يضاف الدجاج و يقلى حتى يتغير لونه ثم يتبل بالبهار و القرفة و الزنجبيل و الفلفل الأسود , ثم تضاف الفليفلة المقطعة و تقلى حتى تذبل , يضاف دبس البندورة و يقلى لبضع ثوان ثم تضاف البندورة المفرومة مع مائها و مكعبات مرق الدجاج و كوب ماء , يحرك الجميع و يترك المزيج حتى يغلي .
- في هذه الأثناء يغسل البرغل و يصفى و يضاف إلى مزيج الخضار المغلي , يضاف ملح حسب الرغبة و يحرك, يغطى القدر و تخفف النار و يترك حتى ينضج مع تقليبه مرة أثناء الطبخ .
- يسكب في طبق التقديم و يزيين بالبصل الذهبي و يقدم مع السلطات و خاصة سلطة الخيار مع اللبن أو المخلل أو العيران .
[facebook] [tweet] [pinterest] [follow id=”biscotart” ]
