السلام عليكم …. إنشاء الله رمضان كريم على كل الأمة الإسلامية و يا رب تغسل قلونا و ذنوبنا و تجعلنا من عتقاء الشهر الفضيل .

سبحان الله دوماً قبل رمضان بتحسي وتيرة الحياة و الحركة فيها صخب كل الناس عم تحاول تخلص شغلها قبل رمضان لحتى تتفرعغ للعبادة

الأيام الماضية كانت شاقة جداً بالنسبة إلي لازم لحق شغل البيت و الوظيفة و براسي شوية وصفات حابة جهزن للموقع برمضان و من كتر تعبي أمبارح ما حسيت ع السحور يعني راح علي السحور و هلق دايب قلبي و عم استنى الأذان لحتى أشربلي شفة من هالعصير و بورد حالي .

حبيت تكون أول وصفاتي الرمضانية عصير صيفي منعش بيبرد الجسم و بيروي العطش بعد يوم طويل و حار من أيام شهر حزيران .

ممكن تقدمي على مائدة الإفطار أو على السحور مع المعروك اللذيذ و الجبن السوري يممممي

طريقة تحضير العصير مختلفة عن الطريقة التقليدية لكن سهلة جداً رح نغلي مجموعة فواكه على النار مع ماء ( أنا اخترت كرز مع مشمش و خوخ ) طبعاً ممكن تستخدمي أي تشكيلة من الفواكه الصيفية مثل الدراق , و بعدها منمرت الفواكه بمصفاية خشنة يعني بدون عصارة فواكه و بدون كهربا شي بسيط و في متناول الجميع .

ممكن تستفيدي من هالوصفة لعمل غرانيتا لذيذة أو سوربه , بتتركي العصير ليبرد تماماً و بتصبي بوعاء و بتحطي بالفريزر , و كل شوي بتحركي و خاصة العصير يلي بدي يجمد ع أطراف الوعاء لحتى نضمن إنو مافي أي كريستالات ماء مزعجة تشكلت و لما يجمد كلياً بالمعلقة بتكحتي طبقات من البوظة و بتحطيها بصحون و بتقدميها .

المقادير :

2 كوب كرز منزوع النوى

15 حبة مشمش منزوع النوى

5 حبة خوخ منزوع النوى

½ 1   كوب الشاي الصغير سكر

½  1  ليتر ماء

الطريقة :

1. توضع الفواكة مع ليتر ماء و كوب صغير سكر في قدر و ترفع على النار حتى تغلي , تخفف النار و تترك حتى تطرى الفواكة و تبدأ قشرتها بالتشقق .
2. توضع مصفاة خشنة فوق وعاء عميق و تسكب مكونات القدر فوق المصفاة و تمرت الفواكة باليد مع الضغط عليها حتى يتساقط لب الفواكه في الوعاء تحت المصفاة .
3. تذوقيها إذا كانت حامضة أضيفي بقية السكر أو حسب رغبتك ( بالنسبة لي استعملت كامل كمية السكر لأن الفواكه كانت حامضة ) و إذا كان القوام كثيف أضيفي باقي الماء بالتدريج حتى يصبح القوام حسب الرغبة , ارفعيها على النار مرة أخرى فقط في حالة إضافة مزيد من السكر أو الماء لتتجانس .
4. قدميها باردة أو مع قطع من الثلج .