سلطة الأرضي شوكي
شهر أيار من الأشهر يلي برجعلي ذكريات خاصة .
عادة بهالشهر بيصير الطقس بسورية ربيع و الجو حلو و مناسب لسيرانة و كنا كل سنة أنا و رفقاتي نعمل سيرانة على الحديقة
و كل وحدة فينا تحضر أكلة من تحت دياتها و تجيبها معها ونقعد فوق العشب تحت شجرة الصنوبر و نحط هالأكلات الظريفة و ترمس الشاي
و يا سلام قعدة رواق و بساطة بدون تكلف و تصنع مع ناس بتعرفي عز المعرفة إنو بيحبوكي لوجه الله ….
من بين هالأكلات اللذيذة سلطة الأرضي شوكي من تحت ديات خالة أم فاضل غير نغم و غير طعم .
سبحان الله كيف الطعام مرتبط بالذكريات مع كل مرة بحضر فيها هالسلطة بذكر هالأيام الحلوة .
سلطة الأرضي شوكي اول مرة دقتها شغل خالة أم فاضل و حبيتها كتير لأنو رغم قلة المكونات و بساطتها إلا أن الطعم روعة و مميز جداً .
هالسلطة لحتى تتطلع طيبة و ظريفة لازم تتحضر من الشوكي يلي بينباع تازة بقصد بدون تقشير و حتى يحافظ الشوكي على اللون الأبيض الحلو رح نحضر التتبيلة بالأول .
و بعدها منقشر الشوكي وحدة وحدة و منفرمها ناعم و مباشرة منحطها بالتتبيلة و بحب هالسلطة تغميس مع الخبز السوري( مممم)
إذا كنتم من عشاق الأرضي شوكي ستجدون في موقع بيسكوتارت عدة وصفات اتحضير الأرضي شوكي مثل شوكي بالزيت … مكدوس الشوكي … غرتان الشوكي … عجة الشوكي . .
المقادير :
5 حبات شوكي
عصير ليمونة و نصف ( أو حسب الرغبة )
4 ملعقة كبيرة زيت
½ ملعقة صغيرة ثوم مهروس
ملح حسب الرغبة
للتزيين : فليفلة حمراء بودرة
طريقة عمل سلطة الأرضي شوكي :
1 –لعمل التتبيلة : يخلط عصير الليمون مع الزيت مع الثوم و الملح في وعاء كبير .
2- تقشر حبة واحدة من الشوكي ثم ينزع الزغب من داخلها و تزال الأجزاء القاسية . يفرم قرص الشوكي فرماً ناعماً ثم تضاف إلى التتبيلة و تحرك جيداً هذا سيحافظ على لون الشوكي الجميل .
3 – تكرر العملية مع باقي حبات الشوكي ثم تسكب السلطة في طبق التقديم و تزيين بالفليفلة الحمراء البودرة .
