كوكيز السكر بالرويال ايسينغ ( بسكوت السكر )

بمناسبة العودة إلى المدرسة و كمان بمناسبة عيد الأضحى بسكويت السكر بالرويال أيسينغ  اختيار مناسب لحتى نفرح حبايب قلبنا الصغار و حتى للكبار ممكن يكون حلى قهوة مميز , و بأعياد الميلاد رح يضيف ألوان جميلة مفعمة بالبهجة .

أحلى  الشي بهالكوكيز إنو بيفجر الإبداع يلي بداخلك , اختاري قطاعات بالأشكال يلي بتحبيها و ألوانك المفضلة , ممكن بعيد الفطر تختاري شكل قمر و بعيد الأضحى شكل خروف و لأعياد الميلاد شكل كيك أو قلوب أو ورود , أطلقي العنان لمخيلتك .

الأشخاص يلي مو مجربين هالنوع من الكوكيز ممكن يخطر ببالن إنو فيو كمية كبيرة من السكر لأن الاسم كوكيز السكر بس بالعكس البسكوتة نفسها كمية السكر فيها كتير معقولة  و هالشي لحتى تكون الزينة يلي أكيد فيها كمية كبيرة من السكر مكملة للنكهة و هيك بصير توازن بين الطرفين , عادة هالكوكيز بيكون سطحها مغطى بالكامل بالرويال أيسينغ و بعدة ألوان لذلك هي وصفة مناسبة لحفلات الأطفال و رح يستمتعوا كتير لما يشاركو بالتزيين و يختارو الألوان يلي بحبوها, أنا بالنسبة إلي لما بحب أعملها للكبار بعمل نصف كمية الزينة و برسم فقط إطارات على الحواف و بالمنتصف هيك منرضي الصغار و الكبار .

بحب أعطي فكرة عن الرويال أيسينغ : هي عبارة عن كريمة مكوناتها كتير بسيطة سكر بودرة و بياض بيض و ليمون , سريعة الجفاف و طبعاً هي صفة جيدة لأنو رح تشكل طبقة لامعة فوق البسكوت و جافة بحيث ما يتخرب شكل الكوكيز عند التخزين , إلها عدة وصفات , وممكن تتحكمي بقوامها عن طريق إضافة السكر إذا كانت مريقة أو بياض البيض إذا كانت سميكة لكن في هذه الوصفة لازم تكون متوسطة السماكة , إذا كانت سميكة رح تعذبك بالتزين و إذا مريقة رح تبلل البسكوتات , يعني خير الأمور أوسطها .

المقادير :

3 كوب طحين ( 390 غ )

½ ملعقة صغيرة ملح

1 ملعقة صغيرة ( ممسوحة ) بيكربونات الصوديوم

1 كوب زبدة بحرارة الغرفة ( 200 ) غ

1 كوب سكر ناعم ( لا يستخدم البودرة )

2 بيضة حجم كبير

1 ظرف فانيليا

للتزيين ( رويال أيسينغ ) :

2 بياض بيضة حجم كبير

2 ملعقة صغيرة عصير ليمون

3 كوب سكر بودرة

الطريقة :

لعمل الكوكيز :

1. ينخل الطحين مع الملح و البيكربونات في وعاء كبير و يترك جانباً .
2. تخفق الزبدة مع السكر حتى تصبح خفيفة و هشة مثل الكريما حوالي 3 – 4 دقائق .
3. يضاف البيض و الفانيليا و نخفق حتى تندمج المكونات ثم نضيف الطحين و نخلط حتى نحصل على عجينة ناعمة إذا كانت العجينة تلتصق بشدة باليد أضيفي القليل من الطحين  , تقسم العجينة قسمين و يشكل كل قسم على شكل قرص و يلف بالنايلون و يترك يرتاح في البراد لمدة ساعة أو حتى يتماسك و يصبح قابل للرق .
4. يحمى الفرن على 180 مئوية و يثبت الرف في وسط الفرن و تغطى صينيتي فرن بوق زبدة , يخرج أول قرص من البراد و يرق على سطح مرشوش بقليل من الدقيق و الأفضل على ورق زبدة بسماكة 1 سم ثم تقطع بقطاعة البسكويت بعد غمسها بالدقيق ثم ترفع بالاستعانة بسكين و ترتب على الصواني و تخبز في الفرن الحامي من 8 – 10 دقائق ( الوقت يعتمد على حجم البسكويت ) حتى تحمر أطراف البسكويت , تخرج من الفرن و تترك تبرد لبضع دقائق ثم تنقل إلى شبك و تترك تبرد تماماً .
5. بعد أن تبرد تماماً تزين بالرويال أيسينغ و تترك الزينة لتجف .

لعمل الرويال أيسينغ :

1. ينخل السكر في وعاء عميق ثم يضاف بياض البيض و عصير الليمون و يحرك الجميع بمضرب يدوي حتى نحصل على مزيج ناعم ( تستخدم مباشرة لأنها تجف بسرعة عند تعرضها للهواء ).
2. تقسم الكمية حسب الطلب إلى عدة أقسام و يلون كل قسم بالون المرغوب و يعبئ في كيس صغير و يربط من طرفه ثم يقص طرف بسيط من الكيس و تزين الكوكيز حسب الرغبة و تترك لتجف بضع دقائق.

ملاحظات هامة :

بالنسبة لمقدار الطحين الأفضل استخدام الوزن .

1. لتزيين الكوكيز بأكثر من لون تغطى باللون الأول و يترك ليجف تماماً ثم تزين باللون الثاني و يترك ليجف و هكذا .
2. إذا لم تكن لديك الرغبة بتزين البسكوتات بالرويال أيسينغ يمكن أن ترش بالسكر الخشن قبل خبزها .
3. هذا البسكوت يحافظ على شكله بعد الخبز لذلك يمكن أن تستخدم ِ قطاعات بالشكل الذي ترغبين به و هو مناسب لحفلات الأطفال .
4. من المهم خبز هذا البسكوت حتى تحمر أطرافه خاصة إذا كنت ترغبين بتزينه بالرويال أيسينغ حتى لا يطرى أثناء التخزين .
5. يجب أن يبرد البسكوت تماماً قبل تزينه .