متبل اليقطين بالطحينة من الوصفات الجديدة و لكن بطابع شرقي .
مرة أحد الأصدقاء قلي ما ضل شي غريب ما عملتي مربى البوملي و متبل الشوندر و حمص بالشوندر و شو لسى كمان ههههه , هي الوصفة كمان تحت رعاية شعار جدد نكهاتك ….. حلو الواحد يطلع عن الشي التقليدي بالطبخ مع المحافظة على النكهة الطيبة .
و بما إنو هالشتوية صاير عندي غرام باليقطين ما ضل وصفة فيها يقطين تعتب علي , و بما إنو قدمت وصفات حلوة باليقطين حبيت قدملكن وصفة متبل اليقطين كمقبلات .
بالوصفة في طريقتين لطبخ اليقطين لحتى تحضروا منو هالوصفة , طريقة بالفرن و طريقة بدون فرن للسهولة .
عندي ثقة رح تحبو لأنو بعد ما صورت هالصحن الحلو حطيتو بالمطبخ و غبت شوي رجعت لاقيت الصحن فاضيييي و عم يلمع و باقي منوه الصورة الحلوة للذكرى .
أتمنى تجربوا الوصفة و تكتبولي رأيكم بالتعليقات أو عن طريق صفحة بيسكوتارت على الفيس بوك
المقادير:
1 كيلو يقطين أصفر
نصف كوب عصير ليمون
4 فصوص ثوم
½ ملعقة طعام ملح أو أقل
نصف كوب طحينة
ربع كوب لبن زبادي
بقدونس للتزيين
طريقة التحضير:
- يقشر اليقطين و ينظف من البذور و يقطع قطعاً صغيرة.
- يسلق على النار حتى ينضج.
- يصفى اليقطين جيدا و يترك يبرد ثم يضغط عليه باليد لتصفى مائه أو يمكنك عوضا عن سلق اليقيطين استخدام وصفة ( بيوريه اليقطين ) .
- يهرس اليقطين بطاحونة الخضار و تضاف إليه الطحينة و اللبن الزبادي يحرك جيداً.
- يدق الثوم مع الملح و يضاف إليهما عصير الحامض و تخلط المواد جيدا.
- يضاف الخليط إلى اليقطين و يحرك.
- يوضع في طبق و يزين بالبقدونس أو النعناع و الفليفلة الحمراء ( البابريكا ) الكمونو زيت الزيتون .
- يقدم مع الخبز العربي و ألف صحة و هنا
